Sexta-feira, 6 Novembru 2026 – Komisaun Funsaun Públika (KFP) no Banku Nasionál Komersiál Timor-Leste (BNCTL) asina Memorandu Entendimentu (MoU) kona-ba kooperasaun iha ámbitu partilla informasaun, hodi fasilita Funsionáriu Públiku (FP) no Ajente Administrasaun Públika (AAP) sira asesu ba kréditu, iha Salaun BNCTL Mandarin Dili.
Serimónia asinatura MoU ne’e hatudu kompromisu husi instituisaun rua atu hametin kooperasaun institusionál, liu husi partilla informasaun no fasilitasaun asesu ba servisu finanseiru, hodi responde ba nesesidade funsionáriu públiku no ajente Administrasaun Públika sira nian.
Iha intervensaun, Prezidente Interinu KFP, José Telo Soares Cristóvão, esplika katak inisiativa kooperasaun ne’e hahú husi diskusaun ne’ebé hala’o ona iha tinan sira liubá, kona-ba difikuldade ne’ebé funsionáriu públiku sira hasoru bainhira hakarak asesu ba kréditu, liuliu tanba rekizitu no prosedimentu administrativu ne’ebé presiza kumpre.
Iha oportunidade ne’e, Prezidente Interinu KFP agradese no apresia lideransa no dirijente BNCTL nian, ne’ebé hatudu disponibilidade no kompromisu atu servisu hamutuk ho KFP, hodi fasilita funsionáriu públiku no ajente Administrasaun Públika sira asesu ba servisu kréditu nian.
KFP mós hato’o katak kooperasaun ne’e la’ós de’it atu fó fasilidade ba funsionáriu sira, maibé mós atu promove benefísiu mútuo entre instituisaun rua, hodi kontribui ba hadi’a bem-estar funsionáriu públiku no dezenvolvimentu nasionál Timor-Leste.
Iha parte seluk, Prezidente Komite Ezekutivu BNCTL, Marcelo de C. Carvalho, hato’o apresiasaun ba KFP, tanba iha inisiativa atu estabelese Memorandu Entendimentu ida ne’e, hodi bele mos apoio servisu BNCTL nian ligadu ba dadus funsiunariu sira nian.
Prezidente Marcelo de C. Carvalho esplika katak, durante ne’e BNCTL hasoru difikuldade atu asesu no verifika dadus funsionáriu públiku sira nian, liuliu atu identifika ho klaru sira-nia estatutu funsionál, hanesan funsionáriu permanente ka kontratasaun.
Tuir Presidente BNCTL, konsidera kooperasaun ne’ebe hala’o liu husi MoU ne’e importante tebes, tanba bele fasilita hodi partilla informasaun entre instituisaun rua, hodi apoia prosesu verifikasaun dadus no hadi’a asesu ba servisu kréditu ba FP no AAP sira. Serimónia asinatura MoU ne’e termina sesaun aprezentasaun kona-ba produtu no servisu finanseiru BNCTL nian ba KFP no aprezentasaun Sistema Informasaun Jestaun Administrasaun Públika (SIGAPNET) ba BNCTL, nu’udar parte ida husi esforsu atu haforsa koñesimentu no komprensaun mútua kona-ba servisu no sistema ne’ebé instituisaun rua ne’e utiliza hela.