Komisaun Funsaun Públika, Ministériu Negósiu Estranjeiru no Kooperasaun hamutuk ho Governu Austrália halo lansamentu ba programa English Language Training for ASEAN Accession (ELTAA) iha salaun nobre MNEC, Praia dos Coqueiros, Díli.
Prezidente Komisaun Funsaun Públika (KFP), Agostinho Letêncio de Deus, enkoraja partisipante sira atu haree sira-nia envolvimentu nu’udar parte ida husi misaun nasionál ne’ebé luan no mós selesionadu, atu hakbesik ba programa ne’e ho dedikasaun no entuziazmu. Ita-boot sira-nia esforsu la’ós de’it atu hasa’e Ita-boot sira-nia abilidade profisionál maibé mós sei kontribui diretamente ba Timor-Leste nia integrasaun susesu iha ASEAN. Hamutuk, ita prepara ita-nia nasaun ba futuru envolvimentu rejionál, kooperasaun no kresimentu ativu.
Nune’e Embaixadora Austrália ba Timor-Leste, Caitlin Wilson enfaze kona-ba Austrália nia kompromisu forte ba tempu naruk atu apoia adezaun ASEAN Timor-Leste nian, Austrália sente orgullu bele apoiu Timor-Leste nia adezaun ba ASEAN iha tempu naruk, inklui mós liu husi inisiativa no programa prátiku sira.
Embaixadora Austrália ne’e hateten, inisiativa formasaun lian ingles ba adezaun ASEAN mós reflete kompromisu boot Austrália nian hodi apoiu dezenvolvimentu kapitál umanu iha Timor-Leste. Ida ne’e hanesan ezemplu di’ak ida kona-ba importánsia ne’ebé ita tau iha haforsa abilidade ne’ebé Governu Timor-Leste fó prioridade, ne’ebé sei iha impaktu ba nafatin bainhira nasaun ne’e integra iha ASEAN.
Entretantu Vise-Ministra Asuntu ASEAN Milena Rangel, hato’o Timor-Leste nia apresiasaun ba parseria ho Australia, no hodi Governu Timor-Leste nia naran, ha’u hato’o ami-nia agradesimentu bo’ot ba Governu Australia ba apoiu no kompromisu ne’ebé forte.
Vise Ministra ba Asuntu ASEAN ne’e hateten, inisiativa ida-ne’e reflete Australia nia kompromisu kle’an ba Timor-Leste nia viajen integrasaun ASEAN nian no haforsa kapasidade servisu públiku nian.
Lansamentu ne’e ofisialmente husi Vise Ministra ba asuntu ASEAN, Embaixdora Austrália no Prezidente KFP ne’ebé hetan partisipasaun husi kargu diresaun no xefias sira husi liñas ministeriais sira, instituisaun direta no indireta sira.
Serimónia lansamentu ofisial ne’e hala’o iha salaun Nobre MNEC, iha sexta-feira, 26 Setembru 2025.
