Kuarta – feira, 02/04/2025 – Kuartu mandatu Komisaun Funsaun Públika tinan 2025 sei kontinua hala’o promosaun grau teste eletronika no promosaun pur antiguidade ba funsionáriu rejime jeral. Baze legal ba promosaun rejime jeral maka dekretu lei númeru 01/2018 ko’alia kona-ba, kareira promosaun pur meritu depois altera ba dekretu lei númeru 05/2019 kona-ba promosaun pesoal kareira jeral no dekretu lei númeru 46/2024 kona-ba, promosaun pur antiguidade hodi promove funsionáriu públiku sira ne’ebé servisu tinan 8 ba leten maibé, seidauk iha promosaun grau.
Dehan Komisáriu portefóliu ba asuntu planeamentu no forsa traballu, José Telo Soares Cristovão iha entrevista eskluziva programa live streaming Ajensia Tatoli I.P, Farol, Dili hodi esplika, klean kona-ba planu promosaun grau no promosaun antiguidade ba funsionáriu públiku rejime jeral iha tinan 2025.
Polítika promosaun grau ba funsionáriu rejime jeral hahú segundu mandatu KFP tinan 2019 nu’udar meius valorizasaun ba funsionáriu públiku rejime jeral ho vakatura pursentu 10 kada grau hanesan grau G ba F, F ba E, E ba D, D ba C, C ba B no B ba A. Promosaun pur meritu hala’o ona dala neen no kada tinan Komisaun Funsaun Públika sempre aprezenta ba Konsellu Ministru hodi hasai rezolusaun Governu hodi aposta ba vakatura ne’ebé iha. Prosesu teste promosaun grau teste eletrónika, komisaun asegura transparansia no la iha intervensaun ruma, tanba teste remata haree kedas nia rezultadu, esplika Komisáriu portefóliu forsa traballu.
Promosaun grau rejime jeral tinan 2024 hala’o iha Dili no rejiaun Oe-Cusse no tinan 2025 planeia atu hala’o mós iha nivel rejional maibé, depende ba liñas internet no fasilidade komputador ne’ebé bele fasilita teste promosaun ba funsionáriu sira atu labele konsentra hotu iha kapital Dili, dehan Komisáriu KFP.
Liga ba promosaun pur antiguidade baze ba dekretu lei númeru 46/2024 ne’e la’ós automátika, vakatura tuir persentajen grau kiik ho pursentu 90 no grau boot pursentu 20, no nia prosesu Komisaun Funsaun Públiika lori ba Konsellu Ministru hodi aprova rezolusaun Governu no tempu besik sei públika no Komisaun mós produz deliberasaun ida kona-ba kotasaun ne’ebé mensiona iha pontusaun kada funsionáriu ne’ebé elijivel. Promosaun antiguidade aposta mós ba méritu hodi haree mós avaliasaun dezempeñu, sertifikadu formasaun, no la falta durante servisu.
Atu asegura transparansia ba prosesu promosaun grau no promosaun antiguidade servisu Komisaun Funsaun Públika sei la haree ba koor no rasa maibé baze ba kritéria ne’ebé regula iha lei atu garante transparansia iha sistema administrasaun públika ida efisien, efikasia, esplika nia.
