Ministériu Edukasaun lansa kursu preparatóriu formasaun ba professor foun sira ne’ebé ingresa mai Funsaun Públika hodi hasa’e kualidade hanorin ba futuru.
Iha abertura kursu ne’e partisipa mós husi Prezidente Komisaun Funsaun Públika Agostinho Letêncio de Deus no Komisária Portfóliu Dezenvolvimentu Kareira Espesial, Anita Tavares Ribeiro de Jesus iha kursu preparatóriu formasaun ba profesór foun sira ne’ebé integradu iha karreira dosente nian, ne’ebé hala’o iha salaun Ian Martin INFORDEPE, segunda-feira 22 Setembru 2025.
Iha diskursu husi Prezidente KFP hatete, formasaun ida ne’e marka inisiu karreira ba dosensia ba profesór sira, hahú ho profesór sira define kona-ba futuru Estadu ida ne’e, tanba Estadu ida ne’e depende tebes ba kualidade profesór sira nian.
Komisaun Funsaun Públika hatudu nia kompromisu hodi apoiu iha prosesu tomak liu-liu iha prosesu rekrutamentu ba profesór sira hotu, ita-boot sira tenki orgullu ba ita-boot sira-nia aan tanba prosesu rekrutamentu ida ne’e prosesu ida ne’ebé transparansia tebes.
Iha abertura husi Ministra Edukasaun Dulce de Jesus Soares hato’o mensagem ba profesor foun sira atu sai profesor ne’e dignidade hanesan funsionáriu públiku ida, husi prosesu tomak ne’ebé mak liu husi Bolsa Kandidatu nian.
Atu eduka la’ós ba hakerek no lee ou siensia de’it maibé eduka mós atu kontribui ba dezenvolvimentu iha nasaun Timor-Leste, kria relasaun di’ak no respeitu ba ema sira seluk tanba ita-boot sira la’ós profesor ba matéria de’it maibé ita-boot sira mós manorin hodi transforma no eduka labarik sira ho onéstiku.
Formasaun ba profesór foun ne’e hamutuk na’in 178 ne’ebé mai husi munisípiu sira husi territóriu Timor-Leste nomós depois remata formasaun ne’e sei simu tomada pose hodi koloka ba fatin ne’ebé mak sira aseita ona.
