07 Abríl 2026, Vizita Primeiru-Ministru Kay Rala Xanana Gusmão mai KFP hodi konfirma pagamentu ba kontratu termu sertu sira, husu KFP atu prepara didiak atu hatan ba media inklui ba instituisaun sira ba esplikasaun klean. Tanba iha media hateten katak, barak la simu osan afeta ba sustentabilidade ekonomia familiar.
Objetivu husi vizita PM nian mai KFP atu kontinua haforsa no motiva servisu Komisaun Funsaun Públika ba prosesu saláriu ba rejime termu sertu nian.
Primeiru-Ministru Kay Rala Xanana Gusmão orienta ba Komisaun Funsaun Públika, tenki prosesa tuir regras no prosedimentus leis ne’ebé hatúr ona. Prosesa didiak, esplika ba sira atu inteira.
Komisáriu KFP, José Telo Soares Cristóvão esplika, prosesu sira ne’e KFP prosesa ona tuir dekretu lei nú.3/2026 kona-ba rejime termu sertu iha administrasaun públika. Prosesa ona iha fulan marsu nia laran, no informa mós katak, KFP ninia funsionárius sira mós esforsu servisu iha fin semana hodi hala’o prosesu sira ne’e ba Ministériu Finansas hodi halo pagamentu.
Vizita ida ne’e, simu direta husi komisáriu José Telo Soares Cristóvão, komisáriu Agapito da Conceição, komisária Anita Tavares Ribeiro de Jesus ho diretores no funsionárius sira.
