DILI, 25 Marsu 2026 – Prezidente Komisaun Funsaun Públika (KFP), Agostinho Letêncio de Deus, hamutuk ho Komisáriu José Telo Soares Cristovão, hala’o reuniaun ho Vise-Primeiru-Ministru, Ministru Koordenadór ba Asuntu Sosiais no Ministru Dezenvolvimentu Komunitáriu, Mariano Sabino Assanami hodi asegura efektivizasaun ba Dekretu-Lei Nu. 3/2026 no atualiza mós progresu reforma nian ne’ebé mak sei ko’alia mós kona-ba Kareira Únika iha Administrasaun Públika.
Objetivu husi reuniaun ne’e mak atu garante katak baze legál foun ne’e implementa ho kordenasaun ne’ebé di’ak iha administrasaun públika ba oin.
Prezidente Komisaun Funsaun Públika aprezenta iha enkontru ne’e foka liu ba implementasaun Dekretu-Lei Nu. 3/2026 no dezenvolvimentu Kareira Únika ba funsionáriu públiku iha administrasaun públika. Meta prinsipál mak atu asegura padronizasaun no kualidade servisu-nian ba Estadu iha territóriu laran tomak.
Rezultadu husi diskusaun ne’e, Vise-Primeiru-Ministru, Ministru Koordenadór ba Asuntu Sosiais no Ministru Dezenvolvimentu Komunitáriu sei aprezenta husi ba Konsellu Ministru, atu hetan desizaun no aprovasaun finál, hodi nune’e reforma sira ne’e bele implementa ho lalais no efisiente.
Iha asuntu hanesan, KFP mós hasoru malu ho Koordenador Gabinete Apoiu ba Sosiedade Sivil.