Bazeia ba sorteiu ne’ebé dada iha tinan 2022, Ministériu Asuntu Parlamentares no Komunikasaun Sosial (MAPCOM) sai hanesan uma nain ba organiza komemorasaun loron nasionál funsaun públika ba dala IX ho tema prinsipal A Influência Das Redes Sociais No Desempenho Dos Servidores Públicos.
Komemorasaun LNFP IX ne’e MAPCOM define atividade 13 ba loron komemorativa ne’e, mak hanesan, abertura LNFP, desportu modalidade rua mak basket no futsal, kompetisaun koral, semináriu jerál iha nasionál no Munisípiu 3 rejionaliza, doasaun raan, movimentu Disiplina uza zebra cross buka konsiensializa komunidade, movimentu pinta plaka, limpeza jerál, marcha saudavel, vizita prizaun, jornada la’o tuir ain fatin ba saudozu prezidente Nicolau Lobato no inagura monumentu, misa agradesimentu no atividade kulmine, esplika Prezidente Komisaun Organizadora Paulino Kintas iha abertura atividade ne’e.
Iha selebrasaun loron nasionál funsaun públika ba dala IX ne’e Prezidente Komisaun Funsaun Públika, Faustino Cardoso Gomes hateten, selebra dia nasionál Funsaun Públika hanesan eventu atu halo reflesaun ho dezafiu sira ne’ebé mak iha oinsá atu ba oin. Halo reflesaun to’o ona iha ne’ebé prestasaun servisu Funsaun Públika, halo reflesaun ba ASEAN nian ita prontu servisu atu hatan ba full membership ASEAN nian. No sita mós ba tranzisaun Governu nian husu nafatin atu serbí ho profisional, integridade iha Funsaun Públika
Iha tempu hanesan Ministru Asuntu Parlamentares no Komunikasaun Sosial, Francisco Jerónimo reprezenta Primeiru Ministru Taur Matan Ruak iha ninia diskursu hateten, hodi PM nia naran agradese ba funsionáriu públiku hotu ne’ebé hamutuk ho VIII Governu ida ne’e, agradese servisu di’ak hodi fo susesu ba governasaun ne’e maske hasoru difikuldade oin-oin maibé, bele ultrapassa situasaun ne’ebé mak iha. Ho esforsu, sakrifisiu, serbí rai ne’e liuliu covid-19 ne’ebé mak ita konsege rezolve, agradese ba buat hotu ba governasaun ne’e too remata.
Nune’e Ministru ne’e dehan, husu ba funsionáriu públiku hotu, ita boot sira mak sai memória institusional Governu ninia hodi lori nasaun ba oin, lalika polítiza Funsaun Públika tanba, ita atu hakarak mantein profisionalizmu di’ak ba oin.
Hatutan Ministru MAPCOM relasiona ho tema ne’ebé MAPCOM deside mak, influénsia redes sosiais iha dezempeñu servidores públikus sira nian, husu atu utiliza meiu digitalizasaun ho profisional no tau tuir nia fatin tanba, rede sosiál influensiadu tebes iha mundu global. Tanba iha VIII Governu ne’e mós prepara ona ba futuru ba Governu Eletrónika ou E-Government.
Relasiona ho Timor-Leste hanesan observador iha ASEAN hola parte iha atividade reuniaun ASEAN nian ba iha full membership ASEAN no husu ba funsionáriu sira lalika baruk no buka aprende tan no sai ema ne’ebé profisional, dehan Ministru iha abertura LNFP iha salaun Ministériu Finansas, Aitarak Laran, Díli.
Partisipa iha abertura atividade lansamentu ba momemorasaun loron nasionál funsaun públika ba dasia hanesan Ministru Petroleo no Minerais, Vise Ministru Saúde, MAPCOM, Sekretariu Estadu Terras no Propriedades, Diretores Jerais, Inspetores no Kargus ekiparadus, diretores nasionais, xefes, funsionárius sira, instituisaun direta no indireta sira hotu.
Abertura ba komemorasaun loron nasionál Funsaun Públika ba dala IX ne’e lansa ho husik balaun 50 ne’ebé reprezenta instituisaun Estadu hotu tantu direta no indireta sira, manu pombu hanesan simbolu fidelidade, dame no domin funsionárius sira nian hodi serbí ba interese Estadu, pátria, povu no nasaun no simbolikamente ba atividade doasaun ran.
