Komisariu Komisaun Funsaun Públika, José Telo Soares Cristovão no Vise Ministru Administrasaun Estatal, Jacinto Rigoberto fó posse ba kargu xefias nain 58, kompostu husi feto nain 10 no mane nain 48 iha Autoridade Munisipal Bobonaro, iha segunda-feira, (01/07/2024) iha Salaun Maria Tapo Bobonaro.
Iha diskursu serimónia tomada de posse ba kargu xefias, Komisáriu Komisaun Funsaun Públika, José Telo Soares Cristovão dehan, posse ita boot sira nian ne’e halo kompleta ona estrututra munisipal nia kuase to’o postu ne’ebé mak konsagra iha estrutura organika Ministériu ninian. Signifika, estrutura prenxe ona liu husi juramentu posse ne’ebé realiza, atu serví de’it ba rai no povu ida ne’e, la iha grupu A ou grupu B.
Husi dadus ne’ebé mak KFP iha 93% ne’ebé ema hotu ho avaliasaun Muito Bom, se hot-hotu hetan avaliasaun Muito Bom, Komisaun hanoin ho presensa ita boot sira fiar katak, iha munisípiu Bobonaro laiha ona hakilar ba atendimentu pasaporte, kartaun Eleitoral, trata dokumentus rai nia la di’ak, ita espera ho kompleta estrutura ida ne’e bele serví di’ak liutan ita nia povu Bobonaro, hateten Komisáriu KFP.
Komisáriu KFP ne’e mós subliña, kargu la’ós privilejiu ka oportunidade, maibé atu serví rai Bobonaro ne’e. Servisu ne’e atu serví de’it ba povu no rai ida ne’e.
Komisáriu mós lori Komisaun Funsaun Públika nia naran konvida, atu servisu ho onestidade, integridade no iha tempu badak KFP, KAK, IGE sei halo vizitas surpreza ba munisípiu sira inklui Bobonaro.
Nune’e vise Ministru Administrasaun Estatal, Jacinto Rigoberto mós louva emposadu sira, hanesan Bobonaro imi tenki servisu unidade, lalika haree ba kargu maibé, haree ba saida mak presiza atu kontribui, hanesan desizaun saida mak imi halo atu Ha’u fiar Bobonaro bele preparadu no kompete ba Kámada Munisípiu poder lokal.
Vise Ministru ne’e mós hateten, autoridade munisípiu Bobonaro nu’udar pessoal koletivu, tuir direitu públiku hetan autonomia administrativa, finanseira, alargada no patrimoniu rasik, sujeitu ba supertendensia no tutela husi Administrasaun Estatal nian tuir estatutu autoridade munisipais sira.
Iha oportunidade ne’e mós nu’udar Prezidente Autoridade fó hanoin fali ba ita hotu katak, atu sai sevidor ba povu, mezmu ita mai ho direferente polítika maibé, iha Administrativu laiha diferensia, ita hotu sai servidor ba povu Bobonaro, la’ós jura atu sai ema boot, sai xefi departamentu no seksaun maibé sai hanesan misionáriu ba povu Bobonaro.
Serimónia posse ne’e partisipa husi Adminitrador Postu sira, komandante PNTL, relijoza, kargus diresaun no xefias inklui família emposadus.
