Komisaun Funsaun Públika, tersa feira ne’e (11 /04/2023) hetan vizita offisial ida husi delegasaun Asosiation of South East Asian Nations (ASEAN), mai husi nasaun Singapura ho objetivu atu rona husi parte Komisaun Funsaun Públika, saida mak sira bele ajuda iha prosesu, atu viabiliza ho lalais ho efetivu Timor-Leste ninia hakrak atu sai full membersip ASEAN.
Husi parte Komisaun Funsaun Públika, partilla ho sira papél saida maka Komisaun Funsaun Públika hala’o to’o ohin loron, prosesu preparativu Timor-Leste ba ASEAN ne’ebé mak KFP hato’o prioridade sira ne’ebé mak kurtu prazu, mediu prazu no longu prazu iha âmbitu ho lalais Timor-Leste bele sai full membership ASEAN, hateten Prezidente KFP iha edifisiu KFP Matadouro, Díli.
Durante enkontru ho delgasaun ASEAN nian husi Singapura, KFP hato’o kestaun hirak ida liga ho polítika no prioridade KFP nian liga ho rekrutamentu, promosaun, nomeasaun no selesaun ba méritu, formasaun jeral no formasaun espesífika ne’ebé funsionáriu sira benefisia, prosesu disiplinar no rekursu umanus Funsaun Públika nian, inklui rejime foun ba senior profisional sira ne’ebé mak atu intrega ita iha prosesu adeazaun Timor Leste ba ASEAN.
Nune’e iha kurtu prazu Singapura kompromete fó apoiu tomak, asistensia iha prosesu, hahú kedas husi elaborasaun termu referensia sira ne’ebé mak nesesariu hodi hetan ema sira ne’ebé apropiadu atu hala’o servisu sira ho efisiente wainhira entrega, tama iha ASEAN.
Liu husi ministériu sira ne’ebé maka iha relasaun ho asuntu sira ne’ebé tama iha ASEAN ninian, nune’e mós ba medium no longu prazu, KFP hato’o planu sira ne’ebé mak iha, Singapura durante ne’e sai nu’udar praseiru importante ida husi KFP, dehan Prezidente KFP, Faustino Cardoso Gomes.
Ita nia funsionariu barak, mak hetan formasaun iha Singapura inkluindu sira ne’ebé maka iha âmbitu adezaun ba ASEAN ne’e mais de oito centos officias senior husi funsaun públika nian, ne’ebé mak hetan formasaun tuir área kompeténsia, liu husi kooperasaun hamutuk ho Singapura. Ne’ebé mak Singapura hanesan nasaun dezemvolvidu iha ASEAN ninia, sira hatudu sira nia kompromisu forte atu apoia Timor-Leste, desde tinan kotuk, iha visita Sua Exelensia Prezidente RDTL ba iha ne’ebá no Singapura destaka forte tebes sira nian kopromisu atu ajuda, asiste, Timor-Leste nia adezaun ba ASEAN, dehan nia.
Komisaun Funsaun Públika, sai nu’udar entidade importante ida tanba ligadu ho Funsaun Públika, ezatamente enkontru ne’e hato’o ba malu ho kompromisu oinsá mak bele ajuda malu iha prosesu adezaun Timor-Leste nia atu sai full membership ba ASEAN. Partisipa iha reuniaun kortezia ne’e Prezidente KFP, Faustino Cardoso Gomes, Komisáriu asuntu disiplinar, Fausto Freitas da Silva, Komisária portfóliu finansas, baze dadus, pensaun no reforma, protokolu no komunikasaun sosial, Maria de Jesus Sarmento, Sekretária Ezekutiva, Maria da Costa Oliveira, delegasaun ASEAN husi Singapura mak Rajpal Singh nu’udar Diretor Jeral ASEAN, Terence Tan, Diretor Ezekutivu ASEAN, Alan Ang no Valerie Lim hanesan Desk Officer ASEAN nian.
