Diretor Nasional Formasaun no Dezenvolvimentu Komisaun Funsaun Públika, Francisco da Costa Pereira entrevista iha programa rádiu METRO FM 94.7 MHz kona-ba Dekretu Lei númeru 13/2020, liga ho knaar KFP iha âmbitu Formasaun ba Funsionariu Públiku sira.
Iha dekretu lei númeru 13/2020 koa’lia kona-ba regulamentu sira ba fundu Kapital Umanu, dekretu ne’e mak regulamenta oinsá formasaun dezenvolvimentu iha administrasaun públika hetan finasiamentu husi FDCH, hodi koa’lia ba finalidade no objetivu, fó kompetensia ba instituisaun sira.
“Liga ho konsellu administrativu iha FDCH mak hanesan Ministériu Ensinu Superior Arte no Kultura, Ministériu Finansas, Ministériu Justisa, Ministériu Petroleo no Minerais no SEFOPE, nune’e regulamenta mós sekretariadu tékniku liga ho rekursu umanu ne’ebé nia estrutura tomak toma konta ba prosesu implementasaun iha FDCH nian. Finaliddade liga ho finansiamentu ba programa sira formasaun no dezenvolvimentu iha Administrasaun Públika, ninia objetivu sira mak atu garante finansiamentu ba iha investimentu formasaun dezenvolvimentu liga ho rekursu umanus ninian, garante seguransa negosiasaun ho sentru formasaun eh instituisaun sira ne’ebé mak sei fó formasaun ba iha Administrasaun Públika, permite retensaun ba verbu sira iha tinan finansiamentu no ikus mak garante transparansia iha Administrasaun Públika,” esplika Diretor Nasional Formasaun no Dezenvolvimentu, Francisco da Costa Pereira.
Iha artigu 19º atu esplika kona-ba se halo saida tuir ninia kompetensia no benefisiu sira ne’ebé mak iha, hanesan kompetensia KFP halo planu estratéjiku sira liga ho formasaun ba funsionáriu públiku sira, INAP hanesan parte implementador hodi implementa polítika sira ne’ebé mak iha. Kontrola diak ba se halo saida, kontrola partisipante sira iha formasaun, kontrola mos planeamentu ne’ebé adekuadu no nesesita duni iha formasaun iha Administrasaun Públika.
Dekretu Lei foun ne’e atu kompleta di’ak liu tan formasaun sira ne’ebé nesesita duni husi liñas ministeriais sira, liga ho formasaun rai laran, rai liur, bolsa estudu ba funsionáriu sira.