Sexta Feira,02-06-23, Ekipa monitorizasaun fiskalizasaun husi KFP, PNTL, KAK, IGE, MdF-DJJPE no MTK-DNTT halo Konferensia imprensa kona-ba iha Viaturas Estadu ne’ebé kontinua sirkula la regras ne’ebé antes ne’e ekipa alerta sai ona bazeia ba Dekretu Lei no. 80/2022 kona-ba regulamentu Viaturas Estadu nian Dekretu Lei no. 6/2003, 30 Abril kona-ba kódiku Estrada, sirkular no.003/GPM/III/2009, kona-ba jestaun tékniku kareta Estadu no sirkular no.001/GPM./X/2012, kontrola movimentu viaturas Estadu no Padraun prosedimentu operasional nian.
Bazeia ba observasaun husi Ekipa Monitorisazaun Fiskalizasaun nota katak, ikus –ikus ne’e Ministeriu no Instituisaun balu la dun kontrola ba utilizasaun Viaturas Estadu iha idak-idak nia fatin, ho nune’e viaturas balu sei utiliza ba fin pesoais maka hanesan; meiudia utilizador sei lori viaturas ba uma, dader kondotores tula iha uma, lokraik tula fali ba uma no loron ferias sei utiliza viaturas Estadu ba asuntus privadu, esplika Xefe Departamentu Patrimoniu Estadu, Cipriano R. Pereira ba jornalista iha iha edifisiu Patrimoniu Estadu Balide, Díli.
Ho nune’e Ekipa Monitorizasaun Fiskalizasaun Konjunta hakarak aviza ba responsavel logistika no patrimoniu iha Ministeriu Instituisaun Estadu, servisu Fundu Autónoma, Autoridade Munisipal no Administrasaun Munisipal hotu, atu halo kontrolu maximu ba utilizasaun viaturas Estadu diariamente iha instituisaun ida-idak tuir regras no prosedimentus ne’ebé mak iha. No fó hatene ba utilizador hotu hodi kumpri avizu hirak ne’e karik utilizador balun ne’ebé la kumpri, halo favor informa ba EMFK atu halo intervensaun imediata, dehan nia.
EMFK sei halo monitorizasaun no intervensaun ba utilizasaun viaturas Estadu ba han meudia, antar jemput iha dader-loraik liu husi atividades check point no sweeping, EMFK sei halo inspesaun direta ba iha lina Ministériu no instituisaun Estadu sira kona-ba papel servisu logistiku no patrimoniu liga no jestaun utilizasaun viaturas Estadu.
Esplika Xefe departamentu ne’e katak, munisipiu 12 no RAOA estabelese ona EMFK ne’ebé mak kompostu husi PNTL munisipiu, DNTT no servisu logistiku, patrimoniu munisipiu sei servisu hamutuk ho EMFK iha Nasional atu kontrola viaturas Estadu iha munisípiu no nasionál. Ba utilizador ne’ebé mak la kumpri avisu sei hetan responsabilidade administrativa, disiplinar no kriminal.
Husu ba publiku halo mos kontrolu ba utilizasaun viaturas Estadu la tuir regras, liu husi hasai fotografia no video hodi lansa iha media sosial no mós facebook CAC ou WA EMFK nia ,77304448,78540197,78678147,no 772330182no bele hodi prosesa, esplika nia.
Iha konferensia ne’e mós Diretur Disiplinar Komisaun Funsaun Públika, Lourenço Barros Magno mós hato’o ba públiku katak, ekipa konjunta ne’e forma iha 2019, hahú halo operasaun, no tuir dadus ne’e KFP simu husi ekipa konjunta hamutuk kazu 22 mai husi ministériu 22, husi fiskalizasaun ekipa konjunta nian hodi prende viatura Estadu liu husi auto stop ka check point iha dalan hamutuk ho polisia nasionál, KAK, Finansas involve mós PDHJ. Iha tinan 2020 iha viatura 6 husi instituisaun 6 mak konsege prosesa ona no aplika ona sansaun ba sira.
Bainhira funsionáriu ida hetan prende nia sei infrenta buat barak porzemplu hatan iha KAK, hatan iha Funsaun Públika ba sira ne’ebé komete iregularidade ne’e ikus mai tenke selu multa to’o iha tribunal no iha tinan 2022 iha kazu rua ne’e daudaun ne’e KFP prosesa hela no kazu seluk ho total 43 ne’ebé mak iha prosesu laran tempu besik sei aplika snasaun no funsionáriu sira. Maske sira hetan sasaun tuir lei no estatutu funsaun públika nian ba sira kontra regras ne’ebé mak iha vigor. Infelizmente iha tinan 2023 seidauk registu kazu maske kazu iha ona maibé, KFP hein ekipa konjunta atu enkamiña ba KFP, por ezemplu funsionáriu sira involve direta iha eleisaun parlamentar ba uza patrimóniu Estadu karik, ikus mai iha infrasaun disiplinar ekipa konjunta sei inkamina ba KFP hodi prosesa tuir kulpa viabilidade ne’ebé mak funsionáriu ne’e komete no iha posibilidade sei hetan sansaun disiplinar tuir estatutu Funsaun Públika, dehan Diretor Disiplinar, Lourenço Barros Magno.