Ekipa mai husi Komisaun Funsaun Públika, PDHJ, CAC, IGE, SEII, MEJD, Ministériu Saúde no Diresaun Jerál Patrimóniu Estadu –Ministériu Finansas realiza diseminasaun iha Postu Administrativu Vemasse-Munisípiu Baucau durante loron rua, (14-15/03/2023), hodi habelar informasaun kona-ba direitu no dever funsionáriu públiku liga ho legislasaun sira ne’ebé vigora iha Funsaun Públika no prosedimentu uzu patrimoniu estadu, prevensaun no kombate korupsaun ba funsionáriu públiku sira.
Objetivu husi diseminasaun ne’e kontinua partilla informasaun sira relasiona ho kuadru legais sira iha funsaun públika ba funsionáriu sira hodi inteira no ba moris di’ak funsionáriu públiku ninian.
Iha abertura diseminasaun ne’e Administrador Postu Vemasse, Pedro da Costa Freitas agradese ba ekipa integradu disponibiliza tempu hodi mai partilha informasaun ba funsionáriu sira iha Postu Administrativu Vemasse no husu ba partisipantes aproveita oportunidade ida ne’e hodi rona didiak material sira ne’ebé orador sira partilla ho nune’e bele implementa iha ida-idak nia servisu fatin.
Iha tempu hanesan Komisária Maria de Jesus Sarmento husu ba partisipante sira atu inteira kestoens sira ne’ebé mak aprezenta husi ekipa durante diseminasaun ne’ebé mak liga ho jestaun rekursus umanus no kestoens sira ne’ebé mak hasoru iha baze, da ne’e tempu opórtunu atu rona saida mak afeta ba ita boot sira nia servisu lor-loron nian.
Komisária dehan, ekipa sei partilla ba kestaun sira liga ho professores, profisionais saúde, pensaun no eventualidade seluk ne’ebé ligadu ho bem estar funsionáriu públiku nian, ekipa iha ne’e atu hatán problema saida de’it mak ligadu ho implemetasaun servisu lor-loron nian liga ho regulamentu sira. Atu bele esklaresidu no konsolida hamutuk liga ho orientasoens sira hodi mellora servisu ba públiku tuir responsabilidade no responsabilizasaun, integridade ho profisional hodi atinje prestasaun ida di’ak ba povu.
Durante diseminasaun partisipantes sira levanta kestaun sira ligadu ho direitu ba lisensa ho vensimentu fins estudus ba Ajentes Administrasaun Públika, subsídiu kargus, efeitu eskalun, estatutu funsionárius kazuais, idade reforma, limitasaun professores iha eskola sira, abonu família, fins estudu, uzu patrimoniu Estadu no assuntu relasionadu sira seluk.
Diretor DNQPFP esplika, relasiona ho kontratadu fila hikas ba planu instituisaun eh ministériu ida atu oinsá kria planu ida di’ak no integradu hafoin bele loke rekrutamentu maibé tenke hetan aprovasaun husi Primeiru Ministru no KFP nia parte prontu fasilita ba prosesu sira.
Komisária Maria akresenta, direitu fins estudu ba ajente labele, maibé ba formasaun nian la taka dalan ba ajente sira atu hetan direitu ba formasaun. Ba kontratu tinan barak maibé seidauk permanente, institisaun presiza análize ba nesesidade servisu, área saida ne’e kada ministériu tenke buka responde ba nesesidade sira ne’e.
Kona-ba kontratadu no voluntáriu la tama kompeténsia KFP nian hodi haree ba ne’e, maibé fila hikas ba ministériu ida-idak atu jere. Relasiona ho asuntu ne’e KFP mós entrega ona proposta dekretu lei tolu ba iha Konsellu Ministru maibé to’o agora ninia prosesu paradu hela iha Konsellu Ministru la iha resposta, dehan Komisária KFP iha diseminasaun iha kuarta feira, (15/03/2023) iha Vemasse.
Kestaun ligadu ho professor sira ba eskalaun, wainhira asume hela kargu la iha direitu ba efeitu progresaun tanba eskalaun simu pakote, wainhira tun ona husi kargu mak foin bele prosesa ba eskalaun, tanba problema edukasaun nian liga ho promosaun kareira ba professor sira husi asistente ba senior fila ba polítika Ministériu Edukasaun Juventude no Desportu hodi haree.
Relasiona ho asuntu uzu patrimoniu Estadu nian ekipa KAK no Patrimoniu Estadu hatan katak, utilizasaun patrimoniu Estadu bazeia ba rezolusaun 130/2021 kona-ba reforma patrimóniu Estadu liu-liu kareta no motorizadas. Tanba fulan-fulan funsionáriu mós simu ona subsidiu transporte fulan nia hodi hatan ba ne’e, no motorizada pool sira hanesan, pool nasional, munisípiu pool liñas ministériu no postu administrativu sira uza ba fins profisionais servisu nia de’it. Exeptu ba de’it kategoria sira hanesan Prezidente Repúblika, Prezidente no vise-Prezidente PN, membrus Governu, Prezidente Supremu Tribunal, PGR, Komisáriu CAC, Provedor PDHJ, Xefe Casa Civil, Prezidente Autoridade, Diretur Nasionál PCIC, Komandante Geral PNTL, DG SNI, Komisárius KFP, Prezidente CNE, Bombeiros inklui Ambulânsia ne’ebé sirkula 24 horas.
Matéria sira aprezenta kona-ba dever no direitu Funsionáriu Públiku, Lae ba asédiu seksual iha funsaun públika, papél PDHJ, KAK, IJE, lisensa no falta sira, avaliasaun dezempeñu, SIGAPnet, uzu patrimoniu Estadu, prevensaun no kombate korupsaun, violensia bazeia ba jéneru no inkluzaun.
Fins diseminasaun ne’e entrega mós sertifikadu ba partisipante sira hamutuk 82, feto nain 16 no mane 66, no entrega mós livru materiais hodi disponivel iha postu hodi bele asesa husi funsionáriu sira.
