22/05/2024, Ekipa integradu kompostu husi Komisaun Anti Korupsaun, Inspesaun Jeral Estadu, Diresaun Jeral Jestaun Patrimoniu Estadu – Ministériu Finansas, Gabinete Inspesaun no Auditoria KFP, Diresaun Nasional Disiplina Étika no Prosedimentu Administrativa, Unidade Peskiza, Polítika no Observasaun Funsaun Públika (UPPOFP) ne’ebé lidera husi Komisáriu Komisaun Funsaun Públika ba asuntu disiplinar, Agapito da Conceição hala’o vizita surpreza ba iha Ministériu Komérsiu no Industria (MCI) hodi haree direta funsionamentu servisu funsionárius públikus no mós utilizasaun patrimoniu estadu.
Objetivu husi vizita surpreza ne’e atu haree besik liu tan instituisaun eh ministériu sira nia atendimentu servisu ba iha públiku, alende ne’e atu hadia servisus administrativas no jestaun rekursus umanus tuir regras, prosedimentu iha Estatutu Funsaun Públika ein vigor.
Komisáriu Agapito da Conceição hateten, objetivu husi ekipa ninia vizita mai ne’e relasiona ho orientasaun husi Primeiru-Ministru ba IX Governu Konstitusional nian hodi atu haree ba iha reforma administrasaun públika, foku ba iha mákina Estadu ba iha funsionalizmu públiku ne’ebé atu hatan ba iha efisiensia, efikasia, livre husi korupsaun, no governasaun di’ak.
Hanesan Komisáriu esplika, Komisaun no ekipa ninia prezensa mai iha ne’e atu halo prevensaun, no ami mai la’ós buka frakeza maibé atu buka hadia IX Governu ne’e la’o ho di’ak no susesu.
Iha vizita surpreza ne’e ekipa integradu identifika funsionárius públikus iha Ministériu Komérsiu no Industria (MCI) servisu la pontual, observa iregularidade iha lista prezensa la tuir regras administrativas, lisensas la tuir regras no prosedimentu ne’ebé iha no kestaun interligadu sira seluk.
Ami mai la’ós atu mai julga maibé atu haree lakunas, iregularidade sira ne’e hodi rekomenda ba hadia ba iha susesu instituisaun no rekursu umanus ba iha futuru, dehan Komisáriu Portefóliu ba Asuntu Disiplinar, Agapito da Conceição.
