Ekipa Konjunta Nota Funsionárius Kontinua La Kumpri Regras no Pontualidade Iha Servisu Fatin

Ekipa konjunta ne’ebé lidera husi Komisaun Funsaun Públika Komisárius Fausto Freitas da Silva no Komisáriu Agapito da Conceição hamutuk ho ekipa husi Komisaun Anti Korupsaun, Inspetoria Jeral Estadu, Diresaun Jeral Jestaun Patrimoniu Estadu-Ministériu Finansas no ekipa husi SKFP kontinua hala’o vizita surpreza ba iha Ministériu Administrasaun Estatal iha sesta-feira, (05-07-2024) iha Colmera, Dili hodi haree ba iha funsionamentu servisu funsionárius públikus no mós uzus ba iha patrimoniu Estadu.
Objetivu husi vizita surpreza ida ne’e atu haree besik liutan Instituisaun eh Ministériu sira nia funsionamentu servisu ba iha atendimentu públiku, haree mós ba iha jestaun ekipamentu no patrimoniu ninian no jestaun rekursu umanus.
Vizita surpreza ida ne’e ekipa realiza baze ba iha regras no prosedimentu estatutu funsaun públika lei númeru 8/2004 alteradu ba lei númeru 5/2009 ein vigor, dekretu lei númeru 8/2003, alteradu ba dekretu lei númeru 80/2022, kona-ba atribuisaun no uzu viatura Estadu no regulamentu veikulu Estadu, no mós rezolusan Governu númeru 130/2021 kona-ba realokasaun no jestaun veikulu Estadu. 
Iha vizita surpreza ne’e ekipa haree iha forsa traballu boot maibé fasiliade suporta ba servisu menus tebes, haktuir diretor jeral KAK.
“Observa iha forsa traballu ke boot, presiza iha forsa traballu ida ke forte, maibé fasilidade ida ne’ebé minimu tebes no funsionariu barak mak laiha ekipamentu hanesan komputador, presiza iha kapasidade jerente sira nia oinsá mak bele aprosima lalais bele iha kolokasaun fatin no ekipamentu ne’ebé adekuadu. Importante halo servisu, nune’e mós maioria kuaze iha Ministériu hotu tuir planu Governu nia halo estabelesimentu forsa traballu servisu loloos tuir Primeiru Ministru nia kontekstu iha 2025 servisu hotu la’o, agora ne’e asegura hela forsa traballu ida ke mais di’ak atu buat hotu la’o di’ak”, haktuir diretur jeral KAK. 
Husi KFP ninia parte, Komisáriu Komisaun Funsaun Públika Fausto Freitas da Silva ho ekipa hala’o mós vizita ba iha Institutu Jestaun Ekipamentu ninian hodi observa lalaok servisu ba iha funsionárius no xefi departementu nia servisu durante ne’e, no rona mós aspirasaun sira husi funsionáriu balun IJE ne’ebé durante ne’e enfrenta, sira informa mós kona-ba sir ania over time no perdiem la iha durante presta sira nia servisu iha munisípiu, maske nune’e oras hatudu ba ona tuku 9:00 maibé seidauk iha funsionáriu no xefes sira ne’ebé mak tama servisu no observa iha realidade terenu fatin mamuk barak.
Hafoin husi IJE ekipa kontinua ba iha Sekretariu Estadu Administrativa Toponomia (SEATOU) iha Vila – Verde hodi observa funsionáriu kontratadu barak ne’ebé mak la iha fasilidade sufisiente atu halo servisu no fatin tur mós limitadu tebes. 
Enkuantu ekipa ida seluk ne’ebé lidera husi Komisáriu Agapito da Conceição haree katak, regras no prosedimentu ne’eb’e iha funsionáriu no dirijentes sira seidauk kumpri ho loloos. “Objetivu vizita surpreza ida ne’e atu haree besik disiplina funsionárius tama serivsu ho oras no tuir regras legal ka lae? Karik iha oras 8:15 ona maibé ita haree funsionárius barak la pontual nafatin. Tuir lei, funsionáriu sira loron ida servisu oras walu (dader tama tuku walu asina no sai 12:00 mak asina tan, depois lokraik nian mós nune’e), ne’e tuir lei ne’ebé define iha estatutu funsaun públika, maibé haree ba tipu lista prezensa sira iha oras tama no oras sai hakerek no asina tama tuku walu maibé realidade ita haree ema tama tuku sia no tuku sanulu. Maibé kuandu ita tama tuir oras ne’ebé laloos tenke justifika, tanba saida mak mai tarde, sistema ida ne’e tenke hadia atu Administrasaun ne’e la’o ho loloos. Alende ne’e haree mós ba iha forsa traballu no ekipamentu hodi fasilita servisu la sufisiente no uzus patrimoniu Estadu tuir regras ka lae? Tanba dala barak públiku kestiona katak, funsionárius barak mak oras servisu la’o pasiar iha loja sira, hodi nune’e ekipa ne’e mai atu komprova no fó hatene ba sira nia superiores atu tau atensaun ba funsiosárius sira tenke kumpri regras servisu nu’udar servidor públiku”, dehan Komisáriu KFP ba asuntu disiplinar, Agapito da Conceição.
Ekipa ninia vizita ida ne’e ba iha MAE sentral, Programa Nasionál Dezenvolvimentu Suku (PNDS), Sekretariu Estadu Administrativa Toponomia (SEATOU), Institutu Jestaun Ekipamentu (IJE) no Sekretariu Estadu Dezenvolvimentu Lokal (SEDL).