Embaixador Timor-Leste ba Korea do Sul hala’o vizita enkontru ida ho Komisaun Funsaun Públika hodi explora hanoin sira balun ligadu ba iha Administrasaun Públika Timor-Leste nian.
Objetivu husi vizita ida ne’e explora hanoin sira ligadu ba Administrasaun Públika Timor-Leste nian em termos polítika Administrasaun Públika Korea ninian, oinsá buka atu adapta no adopta sistema prátika di’ak sira husi paíz refere.
Vizita embaixador Korea nian mai KFP fahe informasaun balun liliu liga ho programa importante sira ne’ebé mak liga ho funsionáriu públiku sira, wainhira iha oportunidade ruma ba iha kapasitasaun, enkontru ida ohin hanesan koordenasaun ida oinsá mak bele KFP aproveita ba oportunidade hirak ne’e bainhira Governu Korea oferese, esplika Prezidente Komisaun Funsaun Públika, Agostinho Letêncio de Deus ba media GMN TV iha ninia knár fatin Matadouro, Dili, iha sesta-feira, (28/02/2025).
Prezidente KFP hateten, husi vizita ne’e partilla mós prioridade KFP nian ne’ebé mak halo hela presiza tebes instituisaun hot-hotu nia hanoin no ba kada individual sira nia koñesimentu di’ak hodi kontribui iha reforma Administrasaun Públika, tanba embaixador mós iha koñesimentu di’ak área rekursu umanus.
Ligadu ba iha sibertétika “cybernetics” ne’e, iha Komisaun Funsaun Públika iha Unidade ida ba Dezenvolvimentu Sistemas Informasaun iha Funsaun Públika (UDSIFP) mesak timoroan de’it ne’ebé mak dezenvolve sistema SIGAP, maibé dezafiu ne’ebé mak infrenta seguransa, tanba ne’e mak ami ko’alia ho sr. Embaixador karik iha kapasitasaun ruma liga ho seguransa IT nian ami husu atu fasilita mós Komisaun atu tuir formasaun iha ne’ebá, dehan Autoridade Funsaun Públika.
Iha tempu hanesan Embaixador Timor-Leste ba Korea do Sul, António Benevides hateten, iha reuniaun ne’e asuntu prinsipal ida mak haree kona-ba formasaun ruma ligadu ba iha cybersicurity no Informatika Teknolojia nian, ne’e parte importante ida ne’ebé mak sei explora, haree posibilidade oinsá mak bele aprosima ho Governu Korea iha ne’ebá no mós ajensia sira iha Timor hanesan KOICA ba área sira ne’ebé sira bele apoia ba.
Embaixador António Benevides ne’e mós hateten katak, sistema Korea nian tudo montado, la’o di’ak no hein katak ho esperensia ne’ebé sira iha bele partilla ho ita iha área administrasaun públika nian, oinsá mak bele la’o tuir dala ida ne’e. Tanba nu’udar nasaun independente ida durante 20 anos ona, presiza prepara aan ba saida mak presiza hadia, no prepara aan ba tama ASEAN nian, ba servisu sira ne’e tenke prepara hodi hasoru, liliu oinsá bele servisu hamutuk hodi hadia ita nia nasaun.
Enkontru ne’e partisipa mós husi Komisárius sira no Sekretária Ezekutiva akompaña husi xefe Gabinete Apoia Prezidente no Komisárius. Hafoin enkontru halo mós vizita ida ba iha Unidade ba Dezenvolvimentu Sistemas Informasaun iha Funsaun Públika (UDSIFP) hodi hetan mós esplikasaun husi Diretor ligadu ba sistema ne’ebé dezenvolve husi ekipa.
