Kuarta-feira loron 26 fulan jullu tinan 2023, Diretur Ezekutivu Agência Nacional para a Avaliação e Acreditação Académica-ANAAA Nilton Paiva halo enkontru ho Prezidente Komisaun Funsaun Públika-KFP Faustino Cardoso Gomes, hodi hetan esplikasaun konaba ba funsiunariu públiku ne’ebe destaka ba iha ANAAA, ligadu ho Suplementu kargu nian.
Iha enkontru ne’e Diretur Ezekutivu ANAAA informa ba Presidente KFP katak iha tempu sira liu ba, destaka funsionáriu sira balu husi Ministériu Edukasaun Juventude no Desportu ba iha ANAAA hodi assume kargu, maibe ligadu ba suplementu ba kargu, nia lala’ok oin nusa, presiza hetan esplikasaun balu husi Komisaun Funsaun Publika.
Hatan ba prekupasaun ne’e Prezidente KFP Faustino Cardoso Gomes hateten, funsionáriu ne’ebé mak destaka ba instituisaun seluk, normalmente saláriu baze selu husi instituisaun oríjem, karik destakamentu ne’e ho objetivu assume kargu, instituisaun benefisíariu presija prevé orsamentu hodi selu suplementu kargu nian, tamba pagamentu refere tenke tuir baze legal dekretu-lei 25/2016 kona-ba suplementu kargu diresaun no xefia nian, iha administrasaun públika. Dekretu Lei refere iha aneksu I Suplementu Diresaun ou Xefia ba funsiunariu públiku ne’ebe asume kargu husi Komisaun servisu, tabela 1 maka hanesan, Diretor Jeral Dolares 519.00, Diretor Nasional $380.00, Diretor Munisipal $346, Xefi Departamentu $310.00 no Xefe Sekasaun $180.00.