Ekipa integradu kompostu husi KFP, KAK, IGE no Diresaun Jeral Jestaun Patrimoniu Estadu Ministériu Finansas lidera husi Komisariu Portefóliu Disiplinar, Agapito da Conceião kontinua hala’o enkontru breves ho Vise Ministru Komérsiu No Industria, Agusto Junior Trindade ba iha objetivu vizita surpreza ida ne’e.
Komisáriu KFP ba portefóliu Disiplinar ba iha sesaun entrevista nian ba jornalista sira hateten, objetivu husi vizita ne’e atu fó atensaun ba iha rekursu umanus atu tau atensaun ba iha funsionárius sira nia pontualidade, asiduidade, atendimentu servisu no prevensaun ba iha iregularidade sira ne’e atu labele akontese tan ba oin.
Iha inspesaun ida ne’e KFP, KAK, IJE no DJJPE haree mós ba iha utilizasaun veikulus estadu tuir regulamentu ka lae no aprovizionamentu, prevensaun ba iha korupsaun no iregularidade sira, esplika Komisáriu hafoin vizitas ba iha MCI iha loron kuarta-feira, 22 maiu 2024.
Iha tempu hanesan Vise Ministru MCI, Agusto Junior Trindade lori Ministeriu nia naran apresia tebes ba inspesaun surpreza husi ekipa konjunta ne’e di’ak teb-tebes ba nasaun ida ne’e nia furak, tanba ita ko’alia boa Governasaun tenke iha check and balance. Importante ba Governantes hotu, sira halo nia servisu husi Instituisaun independente tenke ba observa sira nia servisu la’o di’ak no iha susesu ka lae? ne’e mak bolu fiskalizasaun, sira mai atu haree materias servisu, osan ne’ebé aloka mai MCI uza tuir regras ka lae?
Nia mós hateten ba jornalista katak, patrimoniu estadu hanesan veikulus, komputadores no sel-seluk tan, nu’udar lideransa la’ós liurai maibé, servidor ba povu tanba, osan povu nia uza ho reponsabilidade, benefisia ba povu nia nesesidade no garantia ba boa Governasaun iha mandatu IX Governu Konstitusional.
