Horseik Segunda-feira, 22 Abril 2019 – Komisariu Komisaun Funsaun Públika Assuntu Disiplinar, Antonio Freitas akompanha husi Diretor Nasional Etika Disiplinar, Florindo da Costa hala’o enkontru ho kargus diresaun no xefia iha Ministeriu Agrikultura no Peskas hodi koa’lia asuntu importante tolu maka hanesan, Integridade Institusional, Kode Etika no uzus patrimoniu Estadu.
Durante Komisariu António Freitas nia intervensaun hateten, integridade institusional bazeia lei numeru 05/2011 altera husi lei numeru 08 /2004 regula kona-ba integridade funsional kona-ba envolvimentu kargu xefia iha kazu mal administrasaun no kazu asediu seksual iha servisu fatin, Kode Etika tuir lei numeru 05/2009 altera husi lei numeru 08/2004 koa’lia kona-ba prosesu disiplinar lisensa no faltas sira no uzus patrimoniu estadu, oinsa kargu diresaun xefia sira no funsionariu sira lori kareta estadu iha loron feriadu no KFP mós iha akordu ho parte Polisia atu kontinua halo pasa revista iha loron feriadu.
Enkontru kargus diresaun no Xefia preokupa kona-ba desizaun Komisaun Funsaun Públika desidi ezonera eis diretor nain rua no xefe departamentu ida iha ministeriu Agrikultura no Peska, maske seidauk iha desizaun final husi Tribunal.
Hatan ba preokupasaun ne’e, Komisariu António Freitas esplika, bazeia akordu Komisaun Funsaun Públika ho Ministeriu Públiku iha fulan Jullu tinan 2018 hodi define kona-ba separasaun interferensia kazus no desizaun kazu tuir ida-idak nia kompetensia pena administrativu no pena husi Tribunal . Wainhira haree ba kazu Sivil no kazu krimi, ida-idak nia kompetensia no la halo intervensaun servisu, maske iha KFP bele fo livre maibé Ministeriu Publiku bele kondena, Ministerio Públiku bele fo livre maibé KFP bele kondena administrativamente bazeia investigasaun profundu ne’ebé hala’o, signifika laiha depedensia ba malu, interdepensia maibé sempre komunika ba malu no laos desizaun la interferensia ba malu.
Kazu ba ema nain tolu KFP fo apoiu hodi rekursu kontensipzu aprezenta ba tribunal liu husi defensoria públiku no bainhira tribunal fo livre, KFP sei rekopensa sai fali funsionariu públiku bazeia lei numeru 05/2011 hodi reabilita nia naran.
Komisariu mos haktuir katak, uluk KFP simu deit rezultadu husi tribunal maibé agora lae. Indisius prosesu inklui seguransa alimentar ba kazu paternal ne’ebé envolve kargu xefia ne’ebé iha fen liu ida iha tenki responsabilidade.
Sorumutu ne’e hala’o iha salaun enkontru ministeriu Agrikultura no Peskas, Comoro , Dili.