Komemorasaun ba Loron Nasionál Funsaun Públika ba dasia nian ne’ebé ba tinan ne’e sei organiza husi Ministériu Asuntu Parlamentares no Komunikasaun Sosial (MAPKOM) ne’ebé mak Komisaun Funsaun Públika reuni hikas ho MTKI, CNC, MAPKOM, PAM Díli hodi rona progresu loke dalan ba konstrusaun monumentu Ermori no preparasaun ba Loron Nasional Funsaun Públika ba dasia iha tinan 2023.
“Enkontru ne’e hanesan balansu kona-ba preparativus atividade LNFP, hahú loke dalan hahú husi Metinaro to’o Ermori, atu preparativus ba kontinuasaun monumentu nian no rona mós husi komisaun organizadora ba âmbitu komemorasaun loron nasionál Funsaun Públika inklui jornada la’o tuir ain fatin husi Fatucalo baliza ho Laclubar mota Barege nian hodi sai iha Ermori, Manuterlau postu Metinaro nian. Planu atu retóma fali atividade, situasaun ba klima ne’ebé eziste no dalan ne’ebé iha oinsá, no preparativus kontinuasaun monumentu Prezidensia Repúblika tempu rezistensia nian iha Ermori.”
esplika Prezidente KFP, Faustino Cardoso Gomes.
Tinan ne’e atividade sira ne’ebé mak sei la’o, Komisaun preokupa tanba tinan polítiku, tanba ne’e husu ba ekipa atu aproveita másimu possivél atu restu tempu molok realizasaun ba eleisaun legislativa nian ita mós halo preparativus ba komemorasaun Loron Nasional Funsaun Públika inklui jornada la’o tuir ain fatin ba saudozu Prezidente Nicolau dos Reis Lobato nian ba últimu jornada, tanba dala ruma ema bele kria konfuzaun no bele interpreta sala ba situasaun sira ne’e, no situasaun seluk Komisaun preokupa tanba mudansa Governu, dala ruma mós iha mudansa prioridades, tanba ne’e kontinua buka atu realiza atividade ne’e depois eleisaun parlamentar, dehan Prezidente KFP iha segunda feira, (27/03/2023).
Iha tempu hanesan Prezidente Institutu Jestaun Ekipamentu Apoiu Dezenvolvimentu Infraestrutura (IJEADI) relata, iha tinan kotuk ekipa IJEADI konsege loke ona estrada hahú husi Metinaro nian to’o ona Ermori no husu atu hetan fali atualizasaun kalendáriu husi Komisaun Organizadora hodi bele hadia hikas dalan foun ne’ebé mak loke ona iha tinan kotuk hodi prepara másimu ba realizasaun eventu ne’e.
Husi Centro Nacional Chega (CNC I.P) nia parte atualiza ninia responsabilidade mak prepara ona dezeñu monumentu ba fatin designadu ne’ebé mak KFP hatudu no ho BOQ ne’ebé mak aprova ona iha tinan kotuk. Naran ba monumentu mak Palácio Governo Rezistência iha tinan 1974-1975, ne’ebé mak iha dezeñu ne’e rasik iha ninia reprezentasaun koluna ba pilar boot tolu mak reprezenta iha tempu rezistensia iha Frente Armada, Frente Klandestina no mós Frente Diplomasia no kada pilar reprezenta ninia pilar ida ho narativa ho alturas 7 metrus, ho medidas 24 centimo sura ba luta 24 anos, iha eskada lima, kada eskada iha signifikadu katak, 75 ne’e nu’udar konseitu jeral ne’ebé CNC prepara nu’udar aspetu reprezentativu ba dezeñu ne’ebé hetan aprovasaun husi KFP no MTKI no ba oin CNC halo akompañamentu ba konstrusaun ne’ebé mak sei realiza, haktuir Diretor Ezekutivu CNC, Hugo Fernandes.
Tuir Komisaun Organizadora MAPKOM, Diretor Jeral, Ponciano Leite, seidauk deside fixu data realizasaun, MAPKOM mós prontu hola parte iha prosesu finalizasaun jornada la’o tuir ain fatin. mais ou menus meadus juñu bele finaliza.
Haree ba solidariedade, sentimentu pertense ne’ebé halo ita hotu prontu atu serví maibé MTKI ninia responsabilidade atu oinsá atu prosede lalais, ba atividade ne’e ita hahú ho ekipa avansada, buka la’o tuir ain fatin hahú husi Fatucalo to’o Ermori iha Palásiu Prezidensia Repúblika Rezistensia, hatutan Prezidente KFP iha reuniaun refere.
Iha âmbitu realizasaun ne’e ekipa sira kontinua buka servisu hamutuk ho asegura atividade sira relasiona ho komemorasaun ne’e bele la’o di’ak no mós konstrusaun ba monumentu iha Ermori.