SKFP ho MJ Halo Reuniaun ba Dahuluk Kona-ba Preparasaun Komemorasaun Loron Nasional Funsaun Públika tinan 2019.

21 Fevereiru 2019  – Sekretária Ezekutiva Komisaun Funsaun Públika, Maria de Jesus Sarmento hala’o enkontru dahuluk ho Directora Jeral, Maria J. da silva,  Inspetor Jeral, Lucas Antonio da Costa husi Ministeriu Justisa  ne’ebé sai uma nain ba komemorasaun loron Nasional Funsaun Públika iha tinan 2019,  iha KFP, Vila Verde, Dili.

Durante enkontru Inspetur jeral,  Lucas António da Costa, aprezenta programa  ne’ebé prepara atu hala’o, hodi komemora loron Funsaun Públika ba dala lima tinan 2019. Programa sira maka Jornada lao tuir ain fatin kontinuasaun ba Saudozu Nicolao dos Reis Lobato, hamatak ambiente kuda ai oan rihun atus hat kompostu Hali Portugal, Tebabui, Ketapan, Ai Mahoni no Lontoro, iha area Estrada Foun Komoro Mota Ulun, Tasi Tolu no Praias dos Coqueiros, Fatu-Ahi, Hera Akanunu, vizita prizaun, limpeza geral, seminario, expozisaun, kompetisaun koral muzika, marsa saudavel,  atividade desportivu,  doasaun ran no misa agradesimentu ba loron Funsaun Publika nian.

Ai oan hirak ne’ebé atu kuda, sei hetan apoiu husi Ministeriu Agrikultura  Florestal no sei envolve funsionariu Públiku hotu hodi kuda ai oan hirak ne’e.

Planu programa ba komemorasaun ne’e sei aprezenta ba Presidente Funsaun Públika iha tempu badak, hodi halo diskusaun klean liu ba atividade sira ne’e ho komisaun organizadora husi Ministeriu Justisa hodi determina tempu atu hahú implementa programa hirak ne’e.

Enkontru ne’e partisipa mos xefe Gabinete Presidente, Suzi Paula Marcal, Xefe Rekursus Umanos no Lojistika SKFP inklui Diretores husi Ministeriu Justisa.

Foto : Media CFP