14 Novembru 2022, Komisária Komisaun Funsaun Públika, Maria de Jesus Sarmento halo abertura ba formasaun metodolojia peskiza kualitativu ba funsionáriu nain 15 husi Unidade Peskiza Polítika Observasaun Iha Funsaun Públika iha salaun INAP, Comoro, Díli.
Formasaun ne’e hola parte integrante ida husi prosesu Funsaun Públika, ne’ebé mak sai direitu ba funsionáriu públiku hodi hala’o ninia kareira tuir dekretu lei númeru 38/2012, kona-ba rejime formasaun ne’ebé funsionáriu iha obrigatoriamente tuir formasaun 40 oras ba kada tinan. Alende INAP fó formasaun jenériku iha mós formasaun espesializada ba ema iha área espesial ba profisionalizmu ninian, nune’e formasaun peskiza importante tebes ne’ebé bele ajuda foti desizaun liga ho polítika públika, ho formasaun ne’e fó duni peskiza ne’ebé klean no di’ak ba ezekusaun planu instituisaun ida no hein katak, fó duni benefisiu ba SKFP, atu hala’o nia knaar ho di’ak atu observa informasaun hotu relasiona ho Funsaun Públika, esplika Diretor Jeral INAP, Agostinho Letêncio de Deus.
Iha tempu hanesan diretor Sentru Nasional Sientífika UNTL, José António Lourenço da Costa hateten, UNTL sente onradu tebes hodi hetan konfiansa husi KFP hodi bele fó formasaun ba iha pedagojia investigasaun foku ba métodu kualitativu. UNTL tenta elabora informasaun relevante atu partilla ho partisipante sira hodi bele hatene ezistensia, esensia métodu kualitativu ho nia prosesu haat, polu téoriku, tékniku hodi fasilita formandu sira durante semana ida nia laran.
Ita boot sira sei hatene liu tan oinsá téknika foti dadus, análize dadus feramentas análize dadus ho evolusaun teknolojia relasiona ho formula feramentas seluk hodi fasilita peskiza, haklean Diretor SNIK-UNTL.
Iha mós intervensaun Komisária KFP, Maria de Jesus Sarmento hateten, presizamente ita boot sira nia boa vontade, aproveita tempu hodi aprende, esensial ba funsionáriu públiku atu hasa’e kapasidade no volume traballu ne’ebé mak fó ezijensia ba produtu oi-oin.
Iha II Mandatu KFP, tuir pedidu husi Dr. Rui Araújo ba halo peskiza ba persepsaun atendimentu públiku, liga ho polítika públika oinsá atu foti desizaun liga ho polítika nian, ne’ebé mak Governu atu halo estudus ruma presiza duni KFP nian.
Dosente ne’ebé mak sei hanorin ba iha matéria peskiza nian mak Martinho Pereira no Zacarias da Costa ne’ebé mak servisu iha natureza kualitativa iha UNTL.
Formasaun ba funsionárius sai esensial tanba hodi hasa’e ema nia kapasidade iha Instituisaun Estadu liu-liu iha área peskiza nian dehan, Komisária ne’ebé trata asuntu Portfóliu Administrasaun, Finansas, Baze Dadus, Protokolu no Komunikasaun Sosial iha Funsaun Públika Maria de Jesus Sarmento.
Komisária hatutan, atu hasae kapasidade presiza ho boa vontade atu aprende, tanba tempu ne’e tempu osan mean hodi labele lakon de’it, nune’e mos loron ba loron volume de trabalu kontinua aumenta hodi ezije ita nia produtu servisu oi-oin liu-liu iha área peskiza nian.
Unidade ka Diresaun Peskiza ne’e estabelese iha Funsaun Públika bazeia ba pedidu husi Primeiru Ministru Sesante Rui Maria de Araújo ho objetivu atu hatene prosesu servisu atendimentu Administrasaun Públiku to’o ona iha ne’ebé, adianta Komisária.