Komisaun Funsaun Públika segunda feira, (20/03/2023) realiza enkontru ho Diretores Jerais, Kargus Ekiparadus, Prezidente Autoriedade Munisipal, Administradores Munisipais ho entidades relevantes sira iha Ministériu Finansas Aitarak Laran, Díli.
Enkontru ne’e ho objetivu, atu alerta ba Funsionárius Públikus, Ajente Administrasaun Públika liu husi Diretores Jerais ho Kargus Ekiparadu sira nu’udar servidores Estadu nian atu fó hanoin ba malu hodi labele abandona servisu durante eventu polítiku iha Timor-Leste, subliña Prezidente Komisaun Funsaun Públika, Faustino Cardoso Gomes.
Iha abertura enkontru ne’e, Faustino Cardoso Gomes hateten, alerta ida ne’e atu Funsionáriu sira ho Ajente Administrasaun Públika atu manten integridade Funsaun Públika, manten nia papel nu’udar Instituisaun ne’ebé tenke imparsial hala’o servisu no asegura kontinuidade servisu mezmu ke iha sirkunstânsia kampaña polítika ka eleitorais.
Nu’udar responsavel máxima ba Administrasaun Públika iha Paíz ne’e, hateten maske Konstituisaun hatur no define Direitus Polítikus partisipasaun Polítika ba sidadaun hot-hotu, tantu direta no indireta liu husi Partidus Polítikus atu sai kandidatus hodi eleitu bele partisipa ativa atus polítikus maibé, nu’udar funsionáriu públiku ne’ebé vinkuladu ho deveres no obrigasoens, proibisoens ne’ebé hatur iha Estatutu Funsaun Públika konforme Dekretu Lei nu. 08/2004 ho alterasaun lei nu.05/2009.
Funsionáriu ho Ajente Administrasaun Públika hanesan mákina Estadu, atu oinsá asegura nafatin kontinuidade prestasaun ho responsabilidade ba públiku no oinsá atu labele monu iha iregulariedade sira ne’ebé maka bele ikus mai implika hodi tama ba infrasaun disiplinar, wainhira tama ona infrasaun disiplinar maka sei implika dezenvolvimentu kareira.
Iha okaziaun ne’e Komisáriu KAK, Sergio Hornai hateten, alerta ne’ebé Prezidente Funsaun Públika hato’o ba instituisaun direta no indireta sira atu bele prudente liu iha ita nia formes sira iha vida servisu lor-loron hanesan, Funsionáriu no Ajente Administrasaun Públika iha situasaun determinante ida ne’e, hodi hatudu ita nia imparsialidade no independente.
Nu’udar responsavél KAK nia adianta, atributu sira ne’ebé maka povu no Estadu atribui mai ita hodi nia finalidade, nune’e bele mosu de’it iha nia interese prestasaun servisu ba interese bem estar povu nian no la’ós ona utiliza ba iha interese partidária.
Iha oportunidade Sekretáriu Ezekutivu Povedoria Direitus Humanus no Justisa Ambrosio Graciano Soares subliña, tuir Konstituisaun artigu 27/ no Estatutu Lei no 07/2004 katak, Provedoria iha âmbitu monitorizasaun ba kampaña Prezidênsial, Parlamentar, Sukus no mós ba Kâmara Munisipal sira.
Sekretariun Ezekutivu adianta, bazeia ba esperiênsia ne’ebé maka durante PDHJ detekta iha terenu durante kampaña, profesor sira sempre uza razaun oi-oin no uza maneira oi-oin hodi desvia sira nia dever própriu hanesan manorin hodi abandona sira nia knar hanesan manorin hodi ba partisipa eventu sira seluk.
Tanba ne’e atu labele hamosu tan situasaun hanesan ne’e, maka Prezidente Komisaun Funsaun Públika, konvoka enkontru importante refere hodi antisipa situasaun hanesan iha futuru.
Ho razaun ne’e maka Prezidente Komisaun Funsaun Públika konvoka Enkontru ne’e infelizmente partisipa deit partisipante hamutuk limanulu resin no maioria lá partisipa, maske enkontru importante.
Iha reuniaun ne’e panelista sira mai husi Prezidente KFP, Faustino Cardoso Gomes, Komisáriu KAK, Sérgio Hornai, Reprezentante PDHJ Sekretáriu Ezekutivu, Ambrosio Graciano Soares, Diretor Jeral Jestaun Patrimóniu Estadu, Januário da Gama no marka prezensa iha reuniaun ne’e Komisáriu asuntu disiplinar, Fausto Feitas da Silva, Komisária Maria de Jesus Sarmento portfóliu ba Finansas, Baze Dadus, Pensaun no Reforma, Protokolu no Komunikasaun Sosial.
