Iha Munisipiu Lautem, antes selebrasaun loron Funsaun Publika iha loron 15 Fulan Julhu, Funsionarius ho inisiativa halao aktividades tolu maka hanesan aktividades limpeza Geral, Missa asaun de grasa no Seminariu. Lipeza geral iha Sidade Lospalos lideradu direitamente husi Administrador Munisipiu Lautem Domingos Savio, Missa asaun de grasa iha Igreja Sao Paulo Lospalos dirijida husi Pe. Paroku Venancio Fatima Freitas SDB, no Seminariu loke diretamente husi Administrador Munisipiu Lautem.
Iha homilia Amu Selebrante husu ba Funsionarius Publiku nudar servidor Estadu, tenke kumpri nia dever obrigasaun hala’o atendimentu ba povu ho humildade, hunestidade no loialidade labele hare ba kor ka Organizasaun, tamba Ema hotu iha direitu hanesan, Povu bai-bain to’o Presidente da republika hot-hotu Nasaun nia Ema laiha diferensa.
Amu Selebrante hateten, hala’o knar hanesan Administrador Munisipiu Lautem, Comandantes PNTL sira, Diretores sira no Funsionarius Publiku iha Munisipiu Lautem tomak atu dezenvolve Munisipiu no Nasaun nia destinu ne’e la fasil, hanesan ema matenek sira hateten pozisaun laos previlegiu ba ita goza, maibe responsabilidade ba ita hot-hotu ne’ebe kaer knar importante sira, boot no kiik iha Nasaun laran, tenke iha espiritu atu kolabora no kontribui ba ita nia Munisipiu no Nasaun, pronto atu servi, simu ema ho maneira diak, tamba laiha fatin seluk sira atu ba, hodi trata sira nia dokumentu ruma, maibe tenke ba iha Edifisiu ka fatin atendementu ba sira nia necessidade, tamba ne’e, nudar Funsionarius Publiku prepara’an servi ho vontade halo atendimentu ba ema hot-hotu, familia ka la familia, ferik ka katuas, konhese ka la konhese, sira mosu mai ona, atende nudar ema, tamba importante liu mak ita nia espiritu servi ho hunestu ba ita nia Povu no Nasaun.
Aktividades ba dal-tolu maka hala’o seminariu iha Munisipiu Lautem, hodi konvida Komisariu Portofoliu Disiplinar KFP Fausto da Silva Freitas ba marka prezensa iha serimonia Selebrasaun loron Funsaun Publika dal-sia ne’e, hamutuk ho Funsionarius Munisipiu Lautem tomak. Iha Seminariu ne’e, Komissariu KFP Fausto da Silva Freitas alias Liurai Taçi apresia no agradese Funsionarius ho nia Xefia sira, tamba iha inisiativa diak hodi hala’o seminariu ne’e, no enkoraja Funsionarius sira atu komemora loron Funsaun Publika ba dal-sia ne’e iha Nasional, Regional no Munisipiu, atu halo reflesaun ba prestasaun servisu to’o iha ne’ebe ona, no oinsa atu ultrapassa dezafius ne’ebe iha, ho avansus globalizasaun ohin loron nian, hamosu influensias oi-oin ba Sociedade, maibe kontein mos buat ne’ebe iha nia vantagem no desvantagem ba Sociedade, tamba ne’e primeiru tenke hatene uza rede Sosial ba objetivu ida, atu divulga Informasaun sira ne’ebe pertenente ba administrasaun Publika, hanesan presiza iha aktividade formasaun ba kapasitasaun rekursus humanus.
Administrador Munisipiu Lautem Sr. Domingos Savio iha Serimonia selebrasaun ne’e apresia nia Funsinariu sira ne’ebe sempre kolabora malu hodi Organiza Serimonia selebrasaun loron boot ba Funsaun Publiku ne’e realiza ho sucessu. Iha parte seluk hateten aktividades sira ne’ebe hala’o ne’e mos hanesan loron Komemorasaun hodi hanoin fali Heroi sira, ne’ebe oferese sira nia’an mate hodi Rai ne’e hamrik hanesan nasaun ida hanesan ho Rai seluk iha Mundu. Nu’udar Funsionariu Publiku tenke hanoin atu kumpi didiak dever no obrigasaun sira nudar Timor nia Oan, hodi Dezenvolve ita nia rain.