Maske investigadores sira hakerek ona relatóriu dala barak ona infelizmente la iha mudansa maibe sei manten nafatin. Lia hirak ne’e hato’o husi Komisáriu ba Asuntus Portofolio Disiplinar Fausto Freitas da Silva (LIURAI TASI), iha nia diskursu durante abertura atividade formasaun ba funsionárius investigadores iha Institutu Nasional Administrasaun Públika (INAP) Comoro Dili Segunda-feira (25/04).
Komisáriu husu ba Formandos sira ne’ebé tuir formasaun ne’e, atu fokus hodi aproveita ba oradores sira ne’ebé maka Komisaun Funsaun Públika konvida ne’ebé sei partilla sira nia matenek, atu nune’e bele halo mudansa ho efikaz ba hakerek relatóriu.
Tuir Komisáriu Disiplinar, Fausto Freitas, formasaun ne’e importante no pertinente tebes tanba investigadores sira sei investiga ba kazu indisiplinar sira, elabora Relatóriu ho kualidade no efikaz nune’e wainhira aprezenta ba iha Komisaun hodi analiza no foti desizaun, bazeia ba rekomendasaun sira ne’ebé mak iha.
Komisáriu adianta, wainhira Investigadores halo investigasaun láloos no hakerek relatóriu láloos no la iha kualidade maka sei iha nia risku iha futuru, alende ne’e enkoraja formandu sira atu buka aprende no komprende atu ba oin bele elabora relatóriu ida di’ak no efikaz.
Iha sorin seluk Diretor Nasional Lourenço Barros Magno hateten, formasaun ne’e hala’o durante loron lima (25-29/04) hó tópiku Hakerek Relatóriu rezultadu investigasaun ho Efikaz, ne’e oportunidade ne’ebé importante tebes hodi eleva ita boot sira nia koñesimentu no kapasidade atu funsaun ne’ebé maka halo lor-loron.
Diretor Lourenço Barros Magno, solisita ba formandus ka investigadores sira atu tau atensaun didiak ba oradores ka péritus importantes mai husi Instituisaun Estadu nian durante loron lima nune’e ikus mai bele alkansa buat ruma.
Partisipa iha formasaun ne’e kompostu husi ema nain 20, feto nain 9 no mane nain 11.
Oradores ba Formasaun ne’e mai husi KAK, PSIK, Inspettor Jerál do Estadu, Tribunal das Kontas no Finansas ho durasaun loron lima iha INAP.