Prezidente Komisaun Funsaun Públika (KFP) Faustino Cardoso Gomes akompaña husi Xefi gabinete, Suzi Marçal, Diretor DNAG-SKFP, Agapito da Conceição, hala’o enkontru ida ho Administrador Interinu Miguel Armada Cardoso hamutuk kargu diresaun xefia husi liñas ministeriais iha salaun enkontru munisipiu Covalima, iha âmbitu komemorasaun loron Nasional Funsaun Públika loron 15 fulan jullu tinan 2019.
Presidente Komisaun Funsaun Públika Faustino Cardoso Gomes hateten, objetivu husi enkontru ne’e primeiru atu fo informasaun kona-ba loron Nasional Funsaun Públika ne’ebé monu iha loron 15 fulan jullu tinan 2019. Ho aktividade vizita kortezia ba estabesimentu prizaun Covalima hodi halo refelesaun ba situasaun moris prizioneiru sira nian iha prizaun no mós buka alerta ba servidor estadu hotu hodi hadook an husi tentasaun sira ne’ebé maka bele ikus mai lori funsionariu sira envolve kazu disiplinar tama iha prizaun, tamba tuir dadus husi funsaun públika liu prosesu disiplinar kada tinan funsionariu ne’ebé envolve iha infrasaun disiplinar hamutuk 190, kazu ida envolve funsionariu nain rua ba leten ho kategoria infrasaun disiplinar ne’ebé ho pena ba prizaun preventiva.
Iha oportunidade ne’e kargu diresaun xefia no funsionariu sira husu promosaun atu halo promosaun Grau automatika ba funsionariu, prosesu Disipinar, seguransa sosial no avaliasaun desenpeñu, no polítika nomeasaun ba kargu diresaun xefia sira.
Hatan ba preokupasaun hirak ne’e Prezidente KFP, Faustino Cardoso hateten, KFP oras ne’e halo hela preparasaun ba promosaun jeral ho sitema eletronika, maibé laiha promosaun automatika tamba lei la permite, kona-ba prosesu disiplinar kontinua hala’o ba funsionariu ne’ebé komete prosesu disiplinar bazeia ba keixa ne’ebé hato’o ba KFP, liu husi diresaun Forsa Traballu hala’o hela konsulta ba porposta polítika terseiru alterasaun rejime avaliasaun dezempeñu tamba durante ne’e avaliasaun dezempeñu haree liu ba kompaisaun ka sentimentu hanoin malu la’os responsabilidade servisu no nomeasaun kargu xefia presija despaisu husi Komisaun Funsaun Públika atu hetan direitu ba subsidiu direitu ba kargu diresaun xefia.
Molok remata Prezidente KFP husu ba autoridade munisipiu Covalima atu halo koordenasaun Ministeriu Administrasaun Estatal atu halo deskrisaun servisu ba kada funsionariu nuneé senti responsabilidade ba servisu lor-loron atu mellora servisu administrasaun diak ba públiku no presija halo fiskalizaun iha nivél munisipiu atu bele garante implementasaun projetu dezenvolvimentu hotu ne’ebé implementta iha Munisipiu Covalima.
Enkontru ne’e hala’o iha salaun admnistrasaun munisipiu Covalima kinta feira foin lalais ne’e, iha loron 13 fulan juñu tinan 2019 no partisipa ema hamutuk nain 50 kompostu feto nain 3 no mane nain 47.