25 Novembru 2024 – Funsaun Públika Timor-Leste realiza teste promosaun eletrónika ba daneen ba funsionáriu públiku sira hodi hasa’e grau ba rejime jeral Funsaun Públika iha tinan 2024 ba kandidatu hamutuk 7,654kompostu husi feto nain 1,837 no mane 5,817.
Objetivu kontinua fó oportunidade ba funsionáriu públiku sira ne’ebé prense rekezitus bele tuir teste hodi hasa’e sira nia grau no atu fó serteza ba dezenvolvimentu kareira no hasa’e motivasaun servisu husi funsionáriu públiku sira hodi hatan ba prestasaun servisu Administrasaun Públika ho kualidade, profisional, efikaz no efisiensia.
Prezidente KFP, Agostinho Letêncio de Deus hateten, konkursu promosaun pessoal nian iha rejime jeral kareira nian ba tinan 2024, poder públiku mak estadu nia pilar ida ho interese nasional mak funsionáriu públiku sira submete sira nia aan ba ierarkia ida estrutura kareira nian, iha ne’ebé sira hatudu mós méritu iha oportuniade atu progresa no kontinua hala’o sira nia knár ho di’ak.
Prezidente KFP dehan, desde 2019 KFP hala’o ona konkursu promosaun pessoal ho oportunidade ne’e funsionáriu públiku rihun ba rihun kompete hodi avansa iha sira nia kareira no kualifika ba atividade profisional ne’ebé kompleksu liu.
Iha tinan barak nia laran, rona keisa barak husi funsionáriu sira kona-ba falta oportunidade atu progresa iha kareira, ho ida ne’e mak KFP realiza konkursu promosaun sentralizadu ho eletróniku modernu sira ne’ebé garante imparsialidade no konfidensialidade. Karaterístika foun importante iha 2024 mak posibilidade ba kandidatu sira atu hili área konñesimentu husi área tolu hodi tuir ezame hanesan administrasaun no finansas, ekonomia sosial, área téknika iha engenaria sivil no informátika nian, inklui materia jeral sira seluk, esplika Prezidente KFP iha abertura promosaun iha salaun Aikurus Binani.
Nia dehan, IV madnatu ba tinan ne’e hala’o mós teste online ba funsioárius sira iha estranjeiru no mós pilotu ida ba iha RAEOA hodi fasilita partisipasaun kandidatu sira ne’ebé la presiza halo viajen mai Dili, ida ne’e hanesan projetu ne’ebé tuir loloos tenke habelar ba munisípiu seluk iha futuru mai.
Iha tempu hanesan Vise –Ministru Asuntus Parlamentares iha ninia diskursu dehan, kompromisu IX Governu kontinua fortalese funsaun públika hanesan aliserse fundamental ba dezenvolvimentu Estadu ninian, liuliu iha prestasaun servisu ida kualidade ba ita nia povu no ita nia nasaun. Promosaun ba tinan ne’e hanesan oportunidade no rekoñesimentu ba valorizasaun méritu, kompeténsia no dedikasaun ba sira ne’ebé lor-loron kontribui ba ita nia funsionamentu administrasaun públika.
IX Governu la iha rezerva ba implementasaun kompromisu sira ne’e, tanba durante ne’e públiku haree kontrariu katak, IX Governu presiza kredibiliza sistema rekrutamentu no mós promosaun, husi meiu sira ne’e mak ita bele eleva kredibiliza sistema hodi nune’e públiku fiar sistema ho justu no kredivel, hateten Vise Ministru Asuntu Parlamentares ne’ebé reprezenta Ministru PCM.
KFP hanesan instituisaun xave ba implementasaun supervizaun ba polítika ne’ebé promove ba jestaun administrasaun públika, KFP hanesan guardiaun ba prinsípiu sira ba méritu, imparsialidade, transparensia, ne’ebé sai fundamentais ba susesu iha konkursu ida ne’e. Liu husi servisu ne’ebé rigorozu ne’e KFP halo ho independente bele asegura ba servidor públiku sira ne’ebé avaliadu nu’udar justu no imparsial no vital tebes ba kontrui administrasaun públika, ida ho efisiente, étika, motivadu ne’ebé ita hasoru iha setór administrasaun públika nian, dehan Aderito Hugo da Costa.
Promosaun ne’e realiza liu husi aprovasaun proposta Komisaun Funsaun Públika husi Konsellu Ministru ho rezolusaun Governu núm. 53/2024, 25 de setembro, baze ba Dekretu Lei 1/2018 alteradu ba Dekretu Lei 5/2019, 27 Marsu kona-ba rejime promosaun kareira iha Administrasaun Públika ne’ebé fiksa numeru vagas ba promosaun pessoal ba rejime jeral kareira iha Administrasaun Públika ho total 817 vagas ba promosaun ne’ebé estabelese, husi 47 destaka ba kategoria tékniku superior grau A, 122 ba Tékniku Superior – Grau B, 188 ba Tékniku Profissional – Grau C, 234 ba Tékniku Profissional – Grau D, 149 ba Tékniku Administrativu – Grau E no 77 vagas ba Assistente – Grau F ho kuota 10%.
Iha tinan 2024, KFP halo mós promosaun online ba iha funsionárius diplomata husi MNEK mak haknár aan iha estranjeiru totál hamutuk 40, feto 19 no mane 21 ne’ebé destaka ba nasaun 19 no sidade 23 hanesan Indonézia (Jakarta, Atambua, Kupang, Bali), Abu Dhabi – United Arab Emirate, Portugal- Lisboa, Índia-Nova Delhi, China-Beijing, Australia (Darwin, Sydney), Estadus Unidus Amérika (Nova Iorke no Washington), Thailandia-Bangkok, Japaun-Tokyo, Irlanda do Norte-Belfast, Angola, Inglaterra, Malaysia-Kuala Lumpur, Cuba-Havana, Itália-Vatikanu, Camboja, Korea do Sul, Nova Zelandia, Laos-Vientiane. Nune’e ba tinan ne’e implementasaun ezame ba mós ffunsionárius sira iha RAEOA hamutuk 363, feto 44 no mane 319.
Total kandidatu elejibel ba teste eletróniku ba promosaun tinan ne’e ba kada grau hanesan grau B – A 464, Grau C – B 1152, Grau D-C 1771, Grau E-D 2219, grau F-E 1365 no Grau G-F 683, husi totál akumulasaun kada grau hamutuk 7,654.
Partisipa iha abertura teste promosaun jeral ba funsionárius públikus rejime jeral mak Provedor PDHJ, Komisáriu KAK, Koordenador PROSIVU, juri promosaun no Sekretariadu KFP tomak.
