04 fevereiru 2025, Prezidente Komisaun Funsaun Públika Agostinho Letêncio de Deus no Komisáriu Portefoliu Disiplinar Agapito da Conceição hamutuk ho Ministériu Justisa fó posse no asinatura termu aseitasaun ba Ajente Prizaun foun nain 74 kompostu husi feto 16 no Mmane 68 ho kategoria ba asistente administrasaun ho Grau F.
Guarda Prizioneirus ne’ebé simu ona termu aseitasaun sei koloka ba iha prizaun Suai nain 11, Gleno nain 23 no Díli 38.
Prezidente KFP, Agostinho Letêncio de Deus iha ninia diskursu hateten, prosesu ba konkursu ne’ebé ho transparente husi kandidatus konkorentes 4 mil resin, admitidu nain 74 ba vaga ne’e hatudu prosesu ida ingresu ba Administrasaun Públika ho nia aktus formal no justu.
Prezidente KFP fó parabens ba sira nain 74 nian susesu, ne’ebé hahú servisu ba fulan oin mai, maibé ohin imi asina ona termu kontratu. Wainhira atu ingresu ba funsionariu públiku sei asina tan termu aseitasaun dala ida tan.
Prezidente KFP hakarak hato’o katak, prosesu sira ne’ebé konstitui ho forma públiku ne’ebé vinkula iha Lei, Primeiru Ministru fó orientasaun ba KFP pontus importante rua ida mak husu KFP atu servisu hamutuk ho linhas Ministeriais sira hadia rekursus umanus iha Administrasaun Públika, pontu rua mak halo revitalizasaun Administrasaun Públika hodi konsolida kapasidade rekursu umanus hodi halo atendimentu ba komunidade ho di’ak no justu.
Autoridade Funsaun Públika ne’e husu, posse ne’ebé simu ba ohin nian imi mesak joven de’it prontu atu serví Estadu ne’e ho imi nia enerjia foun, halo atendimentu Administrasaun Públika ho di’ak. No agradese ba kooperasaun ministeriais tomak liliu ba Ministériu Justisa ninia rekursu umanus.
Vise Ministru Justisa, Paulo Remédio enkoraja no fó motivasaun ba emposadu sira no vise tau importánsia liu ba kestaun tolu ida pontualidade, disciplina no nasionalizmu.
Iha tempu hanesan Ministru Justisa, Sergio Hornai iha nia diskursu, fó motivasaun ba emposadu sira, no funsionáriu sai sentru ida no inovador ba transformasaun rekursu umanu sira.
Ministru Justisa husu mós ba emposadu sira atu disiplina, pontualidade no halo koordenasaun servisu iha Institusional entre servisu maluk no superior sira.
Serimonia asinatura termu aseitasaun ne’e entrega mós save ba emposadu motorista nain tolu husi prizaun ida-idak.