Tersa Feira 30-07-2019 –Prezensa Grupu Jestor Profesionais Rekursus Humanos (GJPRU) iha Munisipiu Ainaro atu harmoniza servisu Gestores Rekursus Humanos Nasional no Munisipal hamutuk ho Komisaun Funsaun Públika hodi buka solusaun ba problema ne’ebé Funsionáriu sira infrenta durante ne’e iha munisipiu.
Sekretria Ezekutiva SKFP Maria de Jesus Sarmento hato’o lia hirak ne’e, bainhira halo abertura ba enkontru Grupu Jestores Profesionais Rekursus Humanos (GJPRU) ho Topiku “Promove Profesionalismu Funsionáriu Publiku Munisipiu Ainaro iha Kompetensia no Disiplina”.
GJPRU hari iha Tinan 2011 kompostu husi liñas ministeriais, Komisaun Funsaun Públika, Komisaun Anti Korupsaun, PDHJ durante ne’e hala’o aktividade enkontru mensalmente hodi halo diskusaun ba assuntu Gestaun Rekursus Humanos, halo revisaun ba lei bazeia ba preokupasaun situasaun funsionáriu sira nian hodi hato’o ba Komisaun Funsaun Públika hodi buka solusaun.
Koordenador GJPRU, Terezinha Ximenes esplika, objetivu enkontru GJPRU iha munisipiu Ainaro, atu garante kualidade servisu rekursus umanos ho efisensia, efikasia ho responsabilidade no introdus estabelesementu grupu ne’e iha munisipiu Ainaro. Alende ne’e atu partilla informasaun ba funsionáriu hodi identifika lakunas ne’ebé liga ho implementasaun lejislasaun Funsaun Publika atu bele kria grupu diskusaun entre jestores sira nasional no munisipiu atu alkansa gestaun rekursu umanos ne’ebé diak iha Timor Leste .
Durante enkontru partisipantes hato’o sira nia preokupasaun kona-ba avaliasaun dezempeñu,, promosaun, subsidiu, lei seguransa sosial, reforma funsionáriu sira ne’ebé tinan to’o ona 60 anos, maibé kontinua servisu, no subsidiu ba funsionário ne’ebé mate.
Hatan ba preokupasaun hirak ne’e Sekretaria Ezekutiva Maria de Jesus Sarmentohateten, atu buka solusaun ba problema hirak ne’e, servisu rekursu umanos kada Ministeriu hahu husi nasional to’o munisipiu presija servisu makaas hodi halo koordenasaun ho Komisaun Funsaun Públika no GJPRU ho diak iha futuru.
Enkontru GJPRU nian ne’e hala’o iha salaun enkontru Munisipiu Ainaro no hili mós membru reprezentante rua hodi reprezenta munisipiu Ainaro ba enkontru sira iha nasional mak sra. Aguida Judit Mendonça no xefe Departamentu Rekursu Umanus Nelson Malik Pereira.