Ekipa Steering Commite Grupu Jestores Professionais Rekursu Umanus (GJPRU) presiza komunga kompromisu servisu hamutuk ligadu ho jestaun rekursu umanus iha setór públiku hodi bele hatan ho atempada, responsabilidade ba ezijensia funsionáriu no dosentes sira nian, hodi hamutuk hametin espíritu servi no kompromisu servisu ho di’ak liu tan ba povu no Nasaun Timor-Leste.
Prezidente Komisaun Funsaun Públika, Faustino Cardoso Gomes ko’alia liafuan ne’e wainhira hatan preokupasaun partisipantes sira iha primeiru enkontru grupu jestores profesionais rekursu umanus (GJPRU) ba tinan 2023 ne’ebé Universidade Nasional Timor Lorosa’e (UNTL) mak sai uma nain iha kuarta feira (22/03/2023).
Liga ba preokupasaun partisipantes sira nian kona-ba polítika reforma obrigatóriu,reforma seguransa sosial ba rejime espesial no rejime jeral, polítika formasaun no bolsu estudu ba Funsionáriu Públiku, direitu lisensa anual, lisensa espesial, lisensa sem vensimentu, lisensa espesial ho sein vensimentu, Presidente KFP Faustino Cardoso Gomes husu ba Jestores rekursu Umanus no lideransa husi instituisaun ida-idak nian tenki servisu ho responsabilidade, professional atu servisu la’o ho atempada hodi buka solusaun ba preokupasaun sira ne’ebé mosu husi funsionáriu sira iha kada instituisaun.
Faustino Cardoso Gomes hodi Komisaun, ekipa GJPRU no orador sira hodi kongratua UNTL ne’ebé disponinbiliza tempu, energia hodi sai uma nain no oraganiza ba primeiru enkontru GJPRU nian ba dahuluk tinan 2023.
Materia importante ne’ebé ko’alia maka fortaleser papel rekursus umanus nu’udar meius formasaun professional hodi mellora dezempeñu rekursus umanus, rejime konstribuitivu seguransa sosial, pensaun reforma, manual lisensa sein vensimentu, manual lae ba asédiu seksual no rejime formasaun no dezenvolvimentu Funsaun Públika.
Enkontru GJPRU dahuluk UNTL tinan 2023 halao iha salaun Auditoria Fakuldade Enjeneria Hera ho tema “haforsa papel rekursu humanus liu husi formasaun profesional hodi mellora prestasaun servisu rekursu umanus konta ho partisipasaun magnifiku reitor untl ho nia strutura, diretur rekursus umanus, xefe departamentu, ofisial responsavel rekursus umanus husi linas ministeriais no instituisaun autónoma sira nasionál no munisípiu.
