GJPRU Kontinua Loke Liras ba Munisipiu Liquiça no Ermera

Grupu Jestores Profisionais Rekursus Umanus (GJPRU) hala’o enkontru ho funsionáriu sira iha Munisipiu Liquiça ho tópiku “Dinámika Polítika Uniformizasaun Jestaun Rekursu Umanus” iha salaun Administrasaun Munisipiu Liquiça, (25/09/2020).

Enkontru ne’e funsionáriu sira levanta liu kona-ba sertifikadu formasaun nian ne’ebé mak sai hanesan sasukat ida ba promosaun, levanta kestoens liga ho jestaun rekursu umanus iha munisipiu Liquiça.

Iha tempu hanesan Kordenadora Grupu Jestores Profisionais Rekursus Umanus (GJPRU) no membru steering Komite hala’o mós vizita ba servisu Administrasaun Munisipiu Liquiça.

Iha vizita ne’e hetan lakuna sira hanesan menus fasilidade mak komputador, tanba funsionáriu uza laptop privadu hodi hala’o servisu lor-loron no durante vizita iha sesaun aprovisionamentu, sesaun finansas, rekursu umanus ekipa deteta mós lista prezensa la asina husi funsionáriu durante loron 2 – 3  nian, formulariu ba lisensas, viajen lokal la iha no menus rekursu umanus hodi apoia ba servisu administrasaun munisipiu. Alende ne’e iha administrasaun iha mós pessoal voluntariu mak hala’o servisu iha administrasaun.

Tuir dadus funsionáriu ne’ebé servisu iha administrasaun munisipiu hamutuk 33 inklui kazuais. No total funsionáriu husi linas ministeriais ne’ebé mak presta servisu iha munisipiu Liquiça hamutuk 309 funsionárius.

Alende ne’e Husi JICE-programa JDS mós halo aprezentasaun kona-ba bolsa estudu ba funsionáriu públiku sira ba Japaun ne’ebé iha tempu besik sei hahu inskrisaun iha 16 Novembru 2020.

Enkontru ne’e realiza organiza husi Diresaun Nasional Formasaun no Dezenvolvimentu KFP hamutuk ho ekipa GJPRU no Administrasaun Munisipiu Liquiça no hala’o ona mós iha Munisipiu Ermera, Gleno.

Enkontru GJPRU hamutuk ho funsionariu iha Likisa
Vizita ekipa GJPRU ba servisu administrasaun munisipiu Likisa, iha sesaun rekursu umanus
Vizita ekipa GJPRU ba sesaun aprovisionamentu administrasaun munisipiu Likisa