Ohin, 12 Abril 2019 – Sekretaria Ezekutiva Komisaun Funsaun Públika (SE-SKFP), Maria de Jesus Sarmento partisipa iha reuniaun Grupu Konsultivu Nasional ba boa governasaun no korupsaun ho CEPAD, iha edifisiu CEPAD, Akadiruhun, Dili.
Iha reuniaun ne’e aprezenta mos rezultadu treinamentu ne’ebé durante ne’e CEPAD hala’o iha munisipiu ualu (8), hanesan , Dili-MAP, Aileu, Ainaru, Manufahi, Bobonaru, Covalima, Ermera no RAEOA. Asuntu ne’e sira fo mak hakbiit integridade no koñesimentu iha setór públiku kona-ba boa governasaun. Treinamentu ne’e ho objetivu atu hakbiit integridade, liu husi transparansia, responsabilidade iha setór públiku.
Métodu ne’ebé durante ne’e CEPAD uza ba treinamentu sira mak PAR (Participatory Action Research) atu fó espasu ba partisipantes sira hodi koa’lia saida mak durante ne’e sira hasoru ka sente.
Observasaun preliminar durante iha treinamentu: partisipasaun feto menus, tuir dadus, MAP-Dili feto rua deit mak partisipa no kiik liu mak iha Munisipiu Bobonaru feto ida deit mak partisipa treinamentu refere no funsionariu ka pesoal balun seidauk iha koñesimentu kona-ba liafuan ka termu juridiku sira hanesan pekulatu ka uzu pekulatu atu sira hatene hodi labele halo aktu sira ne’e.
Durante sesaun diskusaun membru sira relata kona-ba kestoens sira atividade servisu ne’ebé liga ho boa governasaun no korupsaun nian ne’ebé ligadu ho ida-idak nia instituisaun iha administrasaun públika.
Iha reuniaun ne’e instituisaun hotu ne’ebé marka prejensa iha neba ho komitmentu ida, katak, sira sei kontinua programa ida ne’e atu dissemina to’o munisipiu no postu administrativu sira ho matéria ne’ebé espesifiku liu tan. No sei lao mós to’o munisipiu haat husi rejiaun I ne’ebé mak presija fó treinamentu.
Partisipasaun grupu konsultivu nasional boa governasaun ne’e husi instituisaun ka ministériu hanesan Ministériu Agrikultura no Peskas, Ministériu Finansas-Alfandegas, Sekretariadu Parlamentu Nasional, Ministériu Edukasaun Juventude no Desportu, SEJD, INAP, SKFP, PDHJ no CEPAD ne’ebé mak sai uma nain ba reuniaun refere.
