Ekipa konjunta boa governasaun kompostu husi Komisaun Funsaun Públika, Komisaun Anti Koruspsaun, Inspesaun Jeral estadu, Ministeriu Finansas-Diresaun Jeral Jestaun patrimoniu estadu iha vizita surpreza ne’ebé hala’o iha Diresaun Nasional Telekomunikasaun no Terestre iha departamentu inspesaun ba veíkulu estadu iha Comoro, iha kuarta-feira, (13/02/2025), deteta inspesaun durante ne’e la’o ho sistema manual tanba, mákina avaria.
Objetivu vizita surpreza ne’e atu haree besik atendimentu públiku hanesan parte ida atu kontrolu disiplina, protesaun direitus umanus, prevensaun no kombate korupsaun atu promove governasaun di’ak iha administrasaun públika liu husi akordu ne’ebé estabelesidu.
Vizita ekipa konjunta ba departamentu inspesaun kareta no motor iha Comoro ne’e rona esplikasaun husi xefe departamentu veíkulu, Domingos Gonçalves Ximenes katak, durante ne’e atendimentu ba inspesaun kareta no motor bele atinje too atus tolu ba loron ida. Maibé haree ba fasilidade ladún favorese, tanba mákina uza ba inspesaun automátika avaria desde iha tinan 2023, remote sei aat hela mak operasaun seidauk funsiona.
Xefe departamentu ne’e esplika, tempu ne’e inspesaun ba kareta ka motor la’o ho manual, iha seksaun Inspesaun veikulu mós enfreta difikuldade tamba, mákina Fuji Film APEOS ida de’it hodi atende ba iha foto kópia no imprime. Maibé, funsionáriu sira esforsu iha fulan ida nia laran atinje halo inspesaun ba kareta no motor rihun lima to’o rihun neen, husi inspesaun ne’e ba kada kareta ida ho dokumentus sei moris no troka sedu selu $20 maibé dokumentus mate selu multa $30.
Komisariu KFP ba asuntu disiplinar, Agapito da Conceição fó hanoin ba xefe Departamentu ho Seksaun atu hato’o relatóriu ba Diretor Nasional hodi halo karta akompañamentu no hato’o mós ba Ministeriu hodi rezolve problema mákina automátiku ne’e. Faslidades seluk ne’ebé fasilita atu atende ba públiku nia nesesidade nune’e hamenus krítika husi kliente sira.
Komisaun ne’e husu atu liu husi publikasaun redes sosiais ka medias publikas, inklui fó atensaun ba broker sira labele manipula sistema atendimentu iha Instituisan Estadu. Aproveita husu osan ba kliente sira hosi kotu-kotuk ne’e presiza antisipa hahalok sira ne’e tamba, imajen ladiak ba Administrasaun Públika.
Husi departamentu inspesaun nia parte hato’o relatóriu tinan – tinan maibé, seidauk atende sira nia pedidu, to’o ohin loron vizita ekipa konjunta nia mai fatin ne’e aproveita hato’o hela, atu husu apoiu hodi reforsa tan pedidu ne’ebé hato’o ona, nune’e bele rezolve difikuldade ne’ebé tékniku sira hasoru iha terenu.
Ekuantu iha vizitas ida ne’e ekipa mós halo verifikasaun ba lista prezensa funsionárius públikus nian iha departamentu refere.
