Díli, 22 Agostu 2022 – Funsaun Públika Timor-Leste realiza teste promosaun eletrónika ba dahaat ba funsionáriu públiku sira hodi hasa’e grau ba rejime jeral Funsaun Públika iha tinan 2022 ba kandidatu hamutuk 7,885.
Total kandidatu elejibel ba teste eletróniku ba promosaun tinan ne’e hamutuk 7,885 ba kada grau hanesan grau B –A hamutuk 353, feto 73 no mane 280, grau C –B hamutuk 1,107, feto 331 no mane 776, grau D – C hamutuk 1,739, feto 618 no mane 1,121, grau E-D hamutuk 2,292, feto 587 no mane 1,705, grau F – E hamutuk 1,508, feto 215 no mane1,293 no grau ikus liu mak grau G-F hamutuk 886, feto 110 no mane 776. Númeru ne’e inklui husi misaun diplomata sira iha rai liur husi sidade 16 no paíz 14.
Ne’e hotu konstitui ba 10% ba kada grau husi kuota rezolsaun Governu nian númeru 19/2022, 4 maiu, hodi bele implementa ba promosaun 2022, bazeia ba Dekretu Lei 1/2018 alteradu ba Dekretu Lei 5/2019, 27 Marsu kona-ba rejime promosaun kareira iha Administrasaun Públika.
Objetivu kontinua fó oportunidade ba funsionáriu públiku sira ne’ebé prense rekezitus bele tuir teste hodi hasa’e sira nia grau no atu fó serteza ba dezenvolvimentu kareira no hasa’e motivasaun servisu husi funsionáriu públiku sira hodi hatan ba prestasaun servisu Administrasaun Públika ho kualidade, profisional, efikaz no efisiensia.
Prezidente KFP enkoraja no husu katak, prosesu ida ne’e kompetetivu ne’ebé husu ba kandidatu sira hakas an ba atu oinsá bele konkista mudansa iha grau nu’udar parte husi dezenvolvimentu kareira..
Total pergunta ba teste eletroniku hamutuk 100, kobre iha áreas legislasaun Funsaun Públika, konstituisaun RDTL, jéneru no inkluzaun, istória nasional, administrasaun públika, jestaun, polítika no planeamentu estratéjiku, komunikasaun, koñesimentu báziku ba TIK, monitorizasaun no avaliasaun, peskiza no análize, matemátika no estatístika bázika, administrasaun no finansas, administrasaun (ofisiu/korespondensia), jestaun finanseira, aprovizionamentu, inspesaun no auditoria, lojístika no patrimóniu, língua tetum no português (iha kompreensaun testu, gramátika no vokabuláriu).
Painel juri sira mai husi liñas ministeriais no ba tinan ne’e KFP inklui sosiedade sivil ADTL no Rede Feto hodi asegura prosesu promosaun to’o remata.
Atividade promosaun ne’e sei dekorre durante loron 18, hahú husi 22 agostu no to’o 15 setembru 2022.
KFP servisu hamutuk ho instituisaun públiku sira no hetan kolaborasaun servisu hamutuk ho Bombeirus, PNTL, Ministériu Saúde, hetan mós apoiu tékniku husi UNTL nain 5 no IOB nain 7, ISFIT nain 5 no estajiariu seluk ne’ebé estajiu iha KFP.
