Kandidatus 2,095 Konkore Vagas Terras no Propriedades ba Munisípiu 12
Prezidente no Komisárius Komisaun Funsaun Públika hamutuk Sekretáriu Estadu Terras no Propriedades, Jaime Xavier Lopez iha segunda-feira ne’e, (03/02/2025) ofisialmente halo abertura ba teste eletronika ba kandidatus hamutuk 2,095 kompostu feto nain 1,053 mane 1,042 atu kompete ba vaga 122.
Prezidente Komisaun Funsaun Públika, Agostinho Letêncio de Deus iha diskursu Komisaun Funsaun Públika printu no servisu hamutuk ho terras no propriedades atu buka rezolve asuntu rekursu umanus terras nian liu husi prosesu rekrutamentu teste elektronika. Liuliu ba iha munisípiu sira ne’ebé to’o ohin loron ita haree sei kontratadu, maibé ita haree iha vaga ne’e iha 2 mil ital mak aplika ba vaga ne’e, maibé, vaga ne’e iha 122 no katak, mil resin sei la passa.
Prezidente KFP enkoraza ba kandidatu sira ne’ebé partisipa iha teste elektornika atu labele influensia rumores sira ne’ebé sirkula iha públiku, katak vaga sira ne’ebé kompete, teste ema iha tiha ona ne’e laloos. Sistema ba prosesu teste eletronika ne’e transparansia tebes tamba depois, kandidatu sira remata teste sei haree direta rezultadu iha dashboad ba rezultadu ne’ebé kandidatu ida-idak konkista. Enkoraza mós kandidatu sira atu labele lakon vontade maibé, importante liu maka kandidatu ida-idak tenki halo preparasaun estuda no utiliza tempu/oras teste ho máximu atu bele hetan valor ne’ebé parte terras presiza. Tanba servisu pesoal terras nian laós servisu jeral maibé servisu espesífiku ne’ebé presiza duni iha koñesimentu báziku ba terras no propriedades no ba prosesu lei sira.
Enkuantu Sekretáriu Estadu Terras no Propriedades, Jaime Xavier Lopez esplika, bazeia ba planu ne’ebé aprovadu orsamentu jeral estadu tinan 2024 hodi rekruta funsionáriu ajente administrasaun públika nain 122 atu koloka ba Munisípiu 12 exeptu RAEOA no Ataúro. Atu hala’o levantamentu tékniku kadastral iha Munisúpiu no sai liman ain terras nian atu fó informasaun ne’ebé loos no kredivel ba populasaun sira tamba, dezenvovimentu atu la’o di’ak presiza solusaun di’ak ba situasaun rai iha Timor – Leste.
Sekretáriu Estadu enkoraza kandidatu sira ne’ebé la liu iha teste eletronika labele lakon vontade, kontinua kompete iha oportunidade tuir mai no sira ne’ebé liu teste eletroniku atu kontinua prepara aan hodi hakat ba prosesu tuir mai.
Teste ne’e hahú iha 03 – 07 fereveiru 2025 iha salaun Aikurus Binani no apoia husi Diresaun Nasional Dezenvolvimentu no Rekrutamentu iha Funsaun Públika ein kolaborasaun ho tékniku no juri husi Sekretáriu Estadu Terras no Propriedades tutela iha Ministériu Justisa no KFP.
