Kandidatus nain 2,360 sei hadau lisuk vaga 96 ba Bombeirus ne’ebé mak destaka ba munisípiu Manatuto, munisípiu Ermera no munisípiu Liquiça.
Realizasaun teste ne’e ein koordenasaun no servisu hamutuk entre Autoridade Protesaun Sivil fasilita husi Komisaun Funsaun Públika hodi realiza teste ba vaga ba sai kadetes Bombeirus 96 ho totál kandidatus nain 2.360 kompostu husi feto nain 449 no mane 1,911 iha salaun Aikurus Binani KFP, Matadouro, Díli.
Iha abertura teste, Prezidente KFP, Faustino Cardoso Gomes agradese ba Autoridade Protesaun Sivil hatudu ninia gratidaun no disponibilidade ba servisu hamutuk ne’e entre KFP hodi fasilita prosesu rekrutamentu ba futurus Bombeirus Timor-Leste ninian. Alende ne’e kongratula ba painel juri sira ne’ebé konsege hala’o prosesu sira ne’e ba realizasaun teste eletrónika.
Iha tempu hanesan Prezidente Autoridade Protesaun Sivil, Ismael Babo mós agradese ba servisu hamutuk entre KFP no APC ba realizasaun teste ne’e no husu ba kandidatu sira atu hatudu sira nia badaen no matenek liu husi teste eletrónika iha komputador. Ida ne’e hanesan faze ba daruak nian ne’ebé hot-hotu kompete iha teste eskrita liu husi komputador.
Prezidente KFP sente kontente, tanba uluk iha Bombeirus mesak mane de’it maibé iha prosesu ne’e iha partisipasaun feto nian ne’ebé hatudu másimu tebes. Alende ne’e Bombeirus ninia servisu ne’e área ida ne’ebé todan oinsá imi atu bele hatudu imi nia kompetitividade iha prosesu ne’ebé imi hala’o.
“Ita boot sira nia servisu importante tebes iha Estadu ida ne’e, imajina oinsá atu hamate ahi, hamate ahi han rai ou dezastre naturais sira seluk, sa tan situasaun klimátika ida muda bebeik rai manas ba bebeik ema aumenta ba bebeik la fasil ida. Ne’ebé imi tenki senti orgullu ho ida ne’e, ho idade joven másimu 38 anos, no husu ba kandidatus sira atu aproveita didiak tempu ne’ebé iha, mobiliza tomak imi nia matenek atu konkista vaga 96 ne’e. Ita senti haksolok tanba iha mós partisipasun feto barak tuir dadus ne’ebé mak iha”, hateten Prezidente KFP.
Atividade teste ne’e sei la’o durante loron 7 (13-21/10/2022) iha salaun Aikurus Binani, KFP.