Komisaun Funsaun Públika aprezenta relatóriu anual KFP 2023 iha plenaria Parlamentu Nasionál iha tersa-feira, 02 jullu 2024 baze ba art.21°Lei No.7/2009, 15 jullu, hateten iha loron ikus fulan marsu kada tinan, KFP tenki aprezenta Relatóriu anual atividade KFP tinan 2023 ba Parlamento Nasionál.
Iha aprezentasaun ne’e Prezidente KFP, Agostinho Letêncio de Deus aprezenta, tuir lei númeru 7/2009 hatur atu KFP hatoo relatoriu anual iha PN, ne’ebé mak relatóriu ba tinan ne’e tema definidu mak “valorizasaun garante prestasaun servisu ba prosperidade ba povu no nasaun”.
Iha sumariu ezekutivu: situasaun internal KFP, forsa traballu funsaun publika, enkuadramentu legal sira mak produz ba iha ambitu funsionalizmu públiku ninian, vizaun estruturante, kompeténsia Komisaun Funsaun Públika no ninia funsionamentu. Parte daruak nian kona-ba aborda prioridade tuir prioridade mandatu datoluk no inisiu mandatu dahaat nian, inklui planu asaun annual 2023 na’ebé aliñadu ho planu estratejia KFP 2015-2030. Parte datoluk kona-ba analiza situasaun global iha administrasaun públika inklui rezultadu monitorizasaun ba iha setór edukasaun ninian, parte dahaat nian hodi ko’alia kona-ba oportunidade, dezafius no estratejia.
Prezidente KFP aprezenta alokasaun orsamentu ba tinan 2023 nian ba KFP hamutuk USD 3,010,442.00 ne’ebé distribui ba iha saláriu vensimentu USD 2,318,108.00, akizisaun bens koerentes USD 204,029.00, ekizisaun servisus koerentes ho totál USD 360,305.00, rendas 25.00, tranferensias koerentes ho total 3 mil, akizisaun ba bens no kapital ho total 100 mil.
Agostinho Letêncio de Deus subliña, husi mudansa VIII governu ba IX governu wainhira iha orsamentu retifikativu KFP hetan ajustamentu orsamentu ka transferesia verba husi eis instituisaun Sekretariu Estadu Komunidade Timorense Iha Estranjeiru (SECTE) ne’ebé estinta iha IX governu ho total 1 milliaun, nune’e afeta ba KFP ninia orsamentu hodi sae ba iha USD 4,010,442.00, orsamentu refereidu sustenta ba iha programa rua, sub programa walu no atividade rua nulu resin tolu (23), husi orsamentu ne’e salariu vensimentu sae ba USD 2,549,156.00, konsege ezekuta 85%, klasifikasaun bens servisus ezekuta 82%, kapital menor 99%, kategoria transferensia atinji 96%, ein jeral KFP konsege alkansa ezekusaun total 85.4% (USD 3,425,690.68 centavos), verba apoiu ba KFP hamutuk USD 15,891.00, ba boa governasaun no jestaun institusional, igualdade jenéru no inkluzaun sosial.
Prezidente KFP ne’e destaka situasaun forsa traballu iha kontekstu funsaun públika 2023 tuir dadus SIGAP FOUN totál 39,380 (F:14,115 no M:25,265) tuir rejime Jurídiku Empregu iha Funsaun Públika (funsionáriu permanente no ajente administrasaun públika).
Iha tinan 2023 ba atividade ne’ebé KFP realiza, promosaun ba kareira rejime jeral dalima ninian funsionáriu promovidu hamutuk 783 (F:218 M:565) hosi instituisaun Estadu 74, rejista proposta vagas foun ho totál 1,701 ba rekrutamentu, selesaun no nomeasaun iha Funsaun Públika no konsege konklui 207 vagas, prosesu selesaun por méritu kargu diresaun no xefia ba pozisaun ho vaga hamutuk 202 konklui 93 reanunsiu 10 pendentes 110, KFP mós halo verifikasaun, analize no rejista fixa avaliasaun dezempeñu funsionáriu Rejime Jerál no Espesiál hamutuk 36,727 (F:12,967 no M:23,760) no prosesa mudansa eskalaun eh progresaun eskalaun ba funsionáriu Rejime Jerál no Espesiál (Nasional no Munisípiu) tinan 2021 ho totál 16,399 ( F: 6,162 M: 10,237); husi ne’e ba profesores MEJD de’it ho totál 4,490 (F:1,829 no M:2,661). Relasiona ho despaisu dixiplinár hamutuk 127 eh 69% mai hosi kazu akumuladu ho totál 185 (kazu foun 2023 no kazu pendente sira hosi tinan 2022).
Alende ne’e KFP mós simu, verifika, analiza no kompila mapa – forsa traballu tinan 2023 ho totál 47,798 (F 17,323 M 30,475), – hosi instituisaun 66 – Nível Nasionál no Munisípiu ba rejime rua (Jerál no Espesiál inklui mos profisionál iha Funsaun Públika). Nune’e atividade diseminasaun ne’ebé realiza ba postus 10 inklui RAEOA (Aileu Vila, Laga, Dili (Posto Administrativo Cristo Rei, Soibada, Maucatar, Lacluta, Passabe, Nitibe, Same Vila no Uatu-Carbau), husi parte formasaun nian rejista sertifikadu hamutuk 4,537 hosi funsionáriu hamutuk 2,370 (F:813 no M:1,557) no rejista mós rekerimentu ba pensaun no reforma (eventualidade tolu) ho totál 377 (F:80 no M:288) rekerentes.
KFP iha 2023, konklui mós atividade monitorizasaun b prestasaun servisu atendimentu públiku iha setór edukasaun nível Munisípais 5 (Aileu, Atauro, Ermera, Oe-Cusse no Viqueque).
Entretantu husi atividade hirak ne’e realiza mós Loron Nasionál Funsaun Públika ba dala sia organiza husi MAPCOMS ho tema jerál “A Influência das Redes Sociais no Desempenho dos Servidores Públicos” no KFP ninia partisipasaun iha reuniaun no workshop sira iha The ASEAN Socio-Cultural Community (ASCC) Fact-Finding Mission (FFM) To Timor-Leste.
Hafoin aprezentasaun KFP simu apresiasaun no sujestaun sira husi distintus deputadus sira iha Parlamentu Nasionál no iha parte seluk Parlamentu Nasional mós husu ba KFP atu aselera lei pensaun no reforma ba idade reforma ne’ebé kontinua presta servisu iha Funsaun Públika, atu nune’e fó oportunidade ba resén graduadus sira.
