Sesta feira, 28 Abríl 2023 – Komisaun Funsaun Públika entrega sertifikadu rekoñesimentu ba funsionáriu idade reforma nain 3 ( Júlio Manuel dos Mártires de Carvalho Correia, Francisca X. Ximenes de Jesus, Jacinto dos Santos), funsionária Leonilda de Fátima Gaio Pinto ne’ebé mak durante ne’e kontribui servisu iha KFP no ida seluk ba funsionáriu matebian Moises Amaral Magno ne’ebé reprezenta husi nia espoza. Alende ne’e entrega mós sertifikadu ba funsionárius foun nain 44 ne’ebé durante loron rua, (17-18 Abríl 2022) tuir diseminasaun hanesan koñesimentu jeral ba kuadru legal Funsaun Públika.
Iha atividade ne’e Prezidente KFP hateten ba funsionáriu foun na’in 44 hatudu ita bo’ot sira nia vontade forte hodi sai servidor ne’ebé maka nakonu ho responsabilidade, hatudu profesionalizmu tuir ita bo’ot sira nia kna’ar, hala’o servisu tuir mekánizmu dezempeñu ne’ebé maka di’ak liu tan.
Ba funsionáriu senior ne’ebé mak tama reforma, instituisaun ninia devér atu fó apresiasaun, sertifikadu ne’e hanesan instrumentu ne’ebé apropriadu hodi fó rekoñesimentu ba tempu servisu no ao mesmo tempo hanesan apresiasaun ba dezempeñu nu’udar funsionáriu servidur Estadu, dehan Prezidente KFP, Faustino Cardoso Gomes iha sala reuniaun KFP, Matadouro, Díli.
Serimónia ne’e atribui sertifikadu ba funsionáriu foun no reformadu sira ne’ebé fó direta husi Prezidente KFP, Faustino Cardoso Gomes no Sekretária Ezekutiva, Maria da Costa Oliveira.
