KFP Atualiza Progresu Reforma Administrasaun Públika ba Ministru PCM

KFP atualiza servisu

Komisaun Funsaun Públika reuniaun ho Ministru Prezidensia Konsellu Ministru, Agio Pereira hodi atualiza servisu Komisaun Funsaun Públika 2024 nian no implementasaun planu prioridades 2025 nian, iha PCM-Palásiu Governu, iha tersa-feira, (21/01/2025).

Prezidente KFP liu husi introdusaun reuniaun ne’e relata progresu servisu KFP nian ba tinan 2024 hahú husi diagnostika forsa traballu, rekrutamentu ba professores sira to’o formasaun karakter ne’ebé KFP define implementa ba dahuluk ba professores sira iha Rairobo durante semana rua, autorizasaun lei reforma obrigatória no aprovasaun ba reforma ba idade limite, definisaun reintegrasaun, promosaun ne’ebé iha tinan 2024 la’ós iha nasionál de’it maibé expanda mós ba iha RAEOA no planu ba oin kontinua ba munisípiu sira. No promosaun ba antiguidade ne’ebé durante ne’e funsionarius sira iha 10 mil ital mak la hetan promosaun ba tinan ne’e sei implementa.

Prezidente KFP esplika mós planu prioridade 2025 nian ne’ebé KFP define ona ba oin sei serntraliza rekrutamentu no hahú halo formasaun karakter ba funsionáriu rekrutadu foun sira ein kolaborasaun ho F-FDTL, definisaun reintegrasaun ba idade reforma ne’ebé forma ona ekipa taks force entre KFP no Ministériu Finansas hodi diskute mós remuneratoriu reintegrasaun. Alende ne’e sei haree mós ba iha rejime avaliasaun dezempeñu, tanba realidade hetan muito bom maibé atendimentu kontinua kestionadu entaun KFP iha hanoin ida atu haree fali ba rejime kareira foun bele ajusta mós ba iha implementasaun sira tenke haree baze ba rezultadu ne’ebé produz husi pessoal. Komisaun Funsaun Públika IV mandatu define mós rejime kareira puru no sei haree mós ba ajustamentu salarial. No ligadu ba asundu edukasaun, saúde nian sei diskute no ministériu relevante hodi rezolve situasaun refere.

Ministru Prezidensia Konsellu Ministru, Agio Pereira mós hato’o mensajen Primeiru Ministru ninian ne’ebé ko’alia liu husi reuniaun Konsellu Ministru ba atu servisu ho etika no profisional, tenta rezolve problema edukasaun no saúde nian.

Ministru PCM haree, sei iha problema dezempeñu, rejime salarial mensal ligadu ba dezempeñu anual, segundu, estrutura hierarkia mak kapasidade atu impoe, haree ba motivasaun, kria kondisaun ba funsionariu sira iha traballu, apozentasaun ne’ebé mak reforma ho saida no implikasaun mak insentivus. 

Sita mós katak, iha diretores balun presiza formasaun tanba balun lakomprende saida mak dezempeñu, tanba mai servisu manán osan maibé ninia empeñu ba produtividade servisu no profisional sei menus. Tanba ne’e tenke iha formasaun kontinue atu bele iha tempu oin mai kuandu promove ita hatene ona saida mak atu halo.

Ligadu ba reforma obrigatoriu, atu haree ba forsa foun sira atu tama mai hodi presta servisu ho di’ak. Reforma obrigatoriu tenke iha ona mós planu ida se mak atu tama fali atu halo servisu ho profisional. Bolsa no formasaun ne’ebé husi FDCH tenke kaer metin pessoal sira ne’e hodi kontribui no presta servisu ba Estadu, tanba uza osan husi Estadu nian, dehan Ministru PCM.

Ministru Agio Pereira subliña, promosaun antiguidade presiza haree, tanba ne’e hanesan prioridade Estadu nian ne’ebé mak KFP presiza garante ninia profisionalidade. Haree mós ba dezempeñu ba rezultadu dezejavel saida? Tenke hanorin ita nia ema sira atu tama servisu ho pontual no haree mós ba dezempeñu sira saida mak mak alkansa ona iha semana ida nian. No estratéjia oinsá atu halo planeamentu ida di’ak atu ekuadra iha planu sira hodi mellora. Avaliasaun tenke haree ba kualidade ba saida mak sira alkansa ona haree hahú husi funsionáriu sira too Asesor sira

Husi reuniaun ne’e Ministru PCM impoe atu KFP haree no buka rezolve mós situasaun setór edukasaun, saúde inklui implikasaun lei reforma nian ba mós setór seluk hanesan PNTL. No husu atu servisu baze ba kodiku konduta funsaun públika nian, ne’ebé servisu mai ho karakter no kontestu servisu ho étika, profisionalidade hodi garante produtividade servisu ho profisional.

Reuniaun ne’e prezensa mós komisáriu portefóliu pensaun no reforma, komisáriu ba asuntu disiplinar, akompaña mós husi Sekretária Ezekutiva no asesór sira.