24 Abríl 2024, Prezidente Interinu Komisáriu ba asuntu Pensaun no Reforma Komisaun Funsaun Públika, Fausto Freitas da Silva, Komisáriu portefóliu forsa traballu, José Telo Soares Cristóvão, Komisáriu portefóliu Disiplina, Agapito da Conceição akompaña husi Sekretáriu Ezekutivu Interinu Diretor Nasionál Planeamentu Kuadru Pessoal iha Funsaun Públika, Francisco da Costa Pereira audiensia iha reuniaun Konsellu Ministrus ne’ebé lidera husi Primeiru Ministru Kay Rala Xanana Gusmão hodi rona aprezentasaun proposta kona-ba idade efetivu reforma funsionárius públikus.
Objetivu husi projetu Proposta Lei ida ne’e atu estabelese mekanizmu nesesáriu sira ne’ebé fó dalan atu promove profisionál joven sira iha Administrasaun Públika nasionál, hodi nune’e bele lori kompeténsia foun ba iha funsionalizmu públiku.
Durante audiensia ba iha aprezentasaun proposta ne’e, maioria apresia husi IX Governu Konstitusional konkorda no aprova projetu Proposta Lei ba autorizasaun lejizlativa kona-ba fiksasaun limite idade relasiona ho servisu funsionáriu públiku no ajente administrativu sira nian, ne’ebé aprezenta husi Ministru Prezidénsia Konsellu Ministrus ein ezersísiu, Adérito Hugo da Costa.
Governu nia objetivu ba projetu Proposta Lei ida-ne’e mak atu Parlamentu Nasionál autoriza hodi fiksa limite idade ne’ebé fó kauza ba sesasaun relasiona ho servisu iha Administrasaun Públika.
Renovasaun ba kuadru iha Administrasaun Públika ne’e nu’udar medida esensiál ida atu asegura melloria servisu sira ne’ebé presta ba populasaun.
