Presidente Komisaun Funsaun Públika-KFP Faustino Cardoso Gomes no Xefe Caza Civil Jesuina Maria Ferreira Gomes quinta feira loron 31 fulan agustu tinan 2023 ofisialmente asina akordu kooperasaun, atu ekipa konjunta hahu halo Diagnostika orgánizasaun no rekursu Humanos iha Presidensia da Republika nian.
Serimonia asina akordu kooperasaun ne’e halao iha salaun enkontru China palasio Presidensia Bairopite Dili, asiste husi Comisaria Maria de Jesus Sarmento no Comisario Fausto Freitas da Silva Liurai Taci, adjunta xefe caza civil Henriqueta Maria da Silva no ekipa teknika sira ne’ebe sei envolve iha ekipa konjunta refere.
Presidente Faustino Cardoso Gomes sublina memorandum entendimentu no despaxu konjuntu ne’ebe asina hanesan dokumentu prinsipal no baze de kooperasaun husi Caza Civil no Komisaun Funsaun Públika hodi bele halao Diagnostika orgánizasaun no rekursu Humanos iha Presidensia da Republika.
Presidente Komisaun Funsaun Públika Faustino Cardoso Gomes iha nia diskursu hateten ho KFP nia prezensa iha salaun China Palásiu Prezidénsia Repúblika nudar Órgaun Soberania ne’ebé aás Nasaun nian, no prazer hamutuk ho jestu ida servisu ekipa ba misaun ida nobre, iha ámbitu halao diagnóstiku ida, nune’e bele hetan estrutura, organizasaun ida efisiente, efikásia, sustentável no la iha politizasaun atu serví ho ezemplar ba Instituisoens estadu sira seluk iha Timor-Leste.
Presidente Faustino Cardoso Gomes lori Komisaun Funsaun Públika nia naran agradese ba konfiansa no konsiderasaun ba dokumentu akordu kooperasaun ho espíritu servisu ho ekipa, hatudu vontade boot hodi konkretiza espetativa no esperansa nasaun tomak nian atu servi.
Sorin seluk xefe caza Civil Jesuina Maria Ferreira Gomes hateten eventu asina akordu kooperasaun entre KFP no Caza Civil importante atu ekipa konjunta bele Diagnostika parte tolu, estrutura ne’ebe hare liu ba lei organika, dekreitu Presidente, sistema sei hare liu ba prosedimentus diskrisaun servisu funsionario sira nian, regulamentus internu Presidensia nian, Parte tolu ne’e Komisaun Funsaun Públika sei hare liu ba rekursus humanos, tamba iha interligasaun ho estrutura no sistema, tamba ne’e husu ekipa konjunta tenki servisu halo koordenasaun hodi buka hatene problema no fo solusaun.
Jesuina Maria Ferreira Gomes esplika antes ne´e nia mos halo ona enkontru ho funsiunariu sira iha Presidensia da Republika nian hodi esplika konaba natureza sira no sei iha diagnostiku ida ne’ebe transparente, sei involve Komisaun Funsaun públika atu garante transparansia tuir prinsipiu boagovernasaun hodi evita aktus Politizasaun iha prosesu Diagnostika.
Prosesu Diagnostiku, Presidente Komisaun Funsaun Públika no Xefe Caza Civil maka sei halo supervizaun direita, no ekipa konjunta sei lidera husi adjunta xefe caza Civil Presidensia da Republika Henriqueta Maria da Silva no Comisaria Maria de jesus Sarmento husi KFP.
Xefe Caza Civil husu ba ekipa trabalho atu servisu ho maximu, professional tuir prinisipiu boagovernasaun liu husi partisipasaun efisiensia no efikasia atu aktividade bele remata tuir tempu. Xefe Caza Civil Jesuina Maria Ferreira Gomes reforça katak prosesu diagnostika sei halao durasaun fulan rua hahu primeira semana fulan setembro no tenki remata iha premeiru semana fulan Novembro tinan 2023.