16-17 Agostu 2022, Komisaria KFP, Maria de Jesus Sarmento lidera ekipa Integradu husi INSS, SEII, PDHJ, IJE, KAK, MEJD, Patrimoniu Estadu – Ministeriu Finansas hala’o diseminasaun iha Postu Administrativu Lequidoe, Munisipiu Aileu hodi partilla regras, prosedimentu iha Funsaun Públika, boa governasaun inklui uzu patrimoniu estadu.
Objetivu husi diseminasaun ne’e atu informa ba funsionárius sira kona-ba koñesimentu kódigu étika dalan ba Governasaun di’ak.
Iha Desiminasaun loron dahuluk, total partisipantes 84 pessoas Feto 17 no mane 64.
Administrador Postu Administrativu Lequidoe, Domingos António liu husi nia breve palavra fó bem vindu ba ekipa Integradu no apresia tebes tanba, durante tinan barak ona sira servisu nu’udar funsionárius públiku maibé, ladun domina kona-ba lalaok Funsaun Públiku. Ne’e duni ohin loron ekipa Integradu mai husi nasional to’o iha Postu Administrativu Lequidoe atu fó hatene buat ruma ba ita liu husi diseminasaun no husu ba partisipantes tomak atu akompaña didiak hodi akapta buat ruma lori fila ba servisu fatin ida-idak.
Iha abertura diseminasaun ne’e Komisaria Komisaun Funsaun Públika, Maria de Jesus Sarmento hateten, ba funsionárius sira no kargus sira aproveita didiak durante loron rua nia laran husi aprende no inteira buat ruma ne’ebé mak ekipa integradu partilla.
Nune’e ekipa ninia papel mai atu partilla informasaun sira liga ho regras sira ne’ebé mak iha no husu atu kumpri dever obrigasaun no direitu sira, maibé iha kumprimentu hirak ne’e interligadu ho buat lubuk ida, iha ita nia fatin servisu ita uzu patrimoniu Estadu, iha regalias no regras sira seluk tan.
Diseminasaun ba loron daruak nian, 17 Agostu, partisipantes 84, no fim husi atividade ne’e fahe mós sertifikadu sira ba funsionáriu ne’ebé mak prezensa iha diseminasaun ne’e no fó mós livrus balun liga ho legislasaun, jestaun rekursu umanus, no prosedimentu sira seluk hodi disponivél hela iha biblioteka postu nian.