Oe-Cusse – Prezidente Komisaun Funsaun Públika, Agostinho Letêncio de Deus no Komisáriu José Telo Soares Cristovão hamutuk ho Diretor Nasional Sistema Jestaun Funsaun Públika, Moises Almeida Sousa Pedroso no ekipa téknika Sekretariadu KFP no akompaña husi Sekretariu Regional Edukasaun sesante Abelina da Costa no Diretor Edukasaun, Daniel Mauno, Diretor Rekursus Umanus Ministériu Edukasaun, Anita Tavares iha segunda feira ne’e (15/01/2024 ) halo enkontru ho tipu dialogu ho profesores kontratadu nain 500 resin iha rejiaun Oe-Cusse ne’ebé naran la tama iha lista ingresu espesial ne’ebé hala’o iha salaun Oeupu.
Iha abertura enkontru ne’e Prezidente KFP esplika importania husi dialogu ne’e parte sekretariu rejional Edukasaun Oe-Cusse, KFP no Ministériu Edukasaun hamutuk hodi identifika problema profesores sira iha rejiaun Oe-Cusse liu husi dalan prosedimentu administrativu tuir interese nasaun nian no tuir ba polítika no orientasaun RAEOA nian.
Objetivu KFP nian mai iha RAEOA atu rona diretamente husi sekretariu rejinal edukasaun no professores liga ba prosesu rekrutamentu forsa traballu, kontratu ba professor sira no mekanizmu tratamentu ba professor sira durante ne’e.
Durante enkontru dialogu ne’e KFP rona preokupasaun sira husi professores ne’ebé kontrata tinan barak nia laran, dezempeñu, no balun ne’ebé konsidera la prense kritérius mak la tama ba prosesu ingresu refere. Nune’e Prezidente KFP, Agostinho Letêncio de Deus mós rekoñese katak, problema professores nian iha RAEOA akontese durante ne’e kestaun la iha komunikasaun di’ak entre Governu sentral ho RAEOA, maske nune’e KFP nia parte kontinua buka atu identifika problema sira oinsá atu fó solusaun ba kestaun ne’e hodi asegura professores sira kontinua hala’o knár nu’udar manorin ne’ebé ho responsavél no kualidade ba futuru edukasaun.
Entretantu, komisáriu KFP, José Telo Soares Cristovão hateten, IX Governu kontinua implementa DL nú.31/2013 kona-ba ingressu espesial ba professor sira maibé tenke prense rekezitus ne’ebé definidu, ne’ebé mak kritérius ida avaliasaun dezempeñu minimu tinan rua nian rejistadu no abilitasaun literaria iha diploma ne’ebé legalizadu husi Ministériu Ensinu Superior.
Hafoin enkontru, ekipa téknika SKFP kontinua ho verifikasaun dadus ba professor sira iha salaun Oenunu rejiaun Oe-Cusse.