08 Setembru 2020 – Komisariu Fausto Freitas da Silva portfóliu asuntu disiplinar reprezenta Prezidente KFP ofisialmente entrega relatóriu rekollamentu planu formasaun no dezenvolvimentu ba Diretora Ezekutiva, Leila Carceres, Fundo Dezenvolvimento Capital Humano (FDCH).
Objetivu husi servisu integradu ida ne’e, atu iha aliñamentu ba politika governu atual, iha efisiensia no efikasia, iha aproveitamentu, kontrolu diak, kumprimentu ba prosedimentu legál sira no sustentabilidade orsamentu.
Formasaun jeneriku tuir konseitu FDCH nian katak área formasaun jeral no formasaun espesializada refere ba formasaun teknika no área espesifiku bazeia ba kompetensia teknika husi kada instituisaun ne’ebe ho estratejia atu reforsa servisu tekniku instituisaun nian. Formasaun jenériku no espesifíku instituisaun hamutuk 10 mak submete planu programa bolsa estudu ho total vaga hamutuk 156 iha área oi-oin.
Durante prosesu rekollamentu, ekipa simu planu husi instituisaun hamutuk 41 no planu formasaun ne’ebe submete abranje ba kategoria jenériku ho pursentu 54% no espesifiku 46 %. Aktividade entrega relatóriu refere partisipa mós diretor nasional Formasaun no Dezenvolvimentu (DNFD), Fransisco da Costa Pereira, diretor jeral INAP ne’e hala’o iha sala reuniaun KFP, Matadouro, Díli.
