KFP Fó Asinatura Termu Aseitasaun Ba Funsionáriu Nain 7 Iha Área Dezenvolvimentu Sistema

Ezijensia ba digitalizasaun sai nu’udar prioridade ba dezenvolvimentu teknologia informátika hodi dezenvolve sistema oioin atu oinsá halo fasil ba prosesu Administrasaun Públika ne’ebé efisiente, efikasia, lalais ba melloramentu iha prosesu atendimentu públiku.

Prezidente Komisaun Funsaun Públika afirma kestaun ida ne’e durante diskursu iha serimónia termu aseitasaun ba funsionariu foun nain 7 mesak mane deit ne’ebé sei integra hodi hala’o knaar iha sistema Komisaun Funsaun Públika nian, iha sesta feira, (15/05/2023).

Faustino Cardoso Gomes hateten, dezenvolvimentu sistema define mós iha planu prioridade terseiru mandatu Komisaun Funsaun Públika nian hodi bele adapta no ajusta an tuir evolusaun mundu nian. Tanba Timor-Leste oras ne’e halo hela esforsu atu sai membru ASEAN, digitalizasaun teknologia ba dezenvolvimentu sistema Administrasaun Públika nu’udar prioridade ida iha mundu informatika digitalizasaun, ne’e esforsu ida maka Komisaun halo prosesu rekrutamentu ba funsionáriu hirak ne’e atu reforsa servisu sistema ne’ebé Komisaun estabelese. 

Autoridade maximu Komisaun Funsaun Públika ne’e husu ba emposadu nain 7 atu bele hala’o knaar ho di’ak no sai nu’udar forsa mutivador prinsipál hodi asegura dezempeñu durante jornada profesionalizmu hamutuk ho funsionáriu sira seluk iha Komisaun Funsaun Públika hodi komunga hamutuk valores prinsipiu servi ho responsabilidade as no kualidade ne’ebé di’ak, labele haree ba interese individu, grupu maibé, ba interese Estadu tuir programa Governu no Estadu Timor-Leste atu hetan satisfasaun no konfiansa husi povu. 

Nune’e Autoridade Funsaun Públika ne’e husu mós ba família emsposadu sira atu fó apoiu, forma moral, espiritual ne’ebé forte hodi asegura sira nia kareira la’o ho di’ak no bele konkista liu tan ho susesu.  

Prezidente KFP husu mós parabens ba ekipa painel juri ne’ebé kompostu husi Ministériu Justica, Tribunal Tekursu hamutuk Komisaun Funsaun Públika konsege asegura prosesu rekrutamentu hahú prosesu selesaun dokumentus to teste eletronika no entrevista ba kandidatu hamutuk nain 63, ho ikus mai ho rezultadu ema nain 7 maka adminitidu no ikus mai simu termu aseitasaun. 

Serimonia termu aseitasaun hala’o iha salaun Komisaun Funsaun Públika, Matadouro, Díli konta ho partisipasaun Prezidente no Komisarius inklui estrutura Sekretariadu Komisaun Funsaun Públika no funsionáriu hotu.