Funsionariu foun hamutuk 44 Kinta-feira loron 23 fulan Marsu ba asinatura termu aseitasaun iha edifísiu Komisaun Funsaun Públika husi Prezidente Faustino Cardoso Gomes testemuña husi Komisáriu KAK Sergio Hornai ho Amu Pároku Balide Dili Padre Ângelo Salsinha.
Tuir Prezidente Faustino, katak prosesu ne’e la’o, tanba bazeia ba aprovasaun husi Primeiru Ministru Taur Matan Ruak ne’ebé maka Komisaun Funsaun Públika propoen ba vagas 53 felizmente 44 maka prenxe ona rekejitus inklui ba sira ne’ebé maka tenke reanúnsiu ne’ebé sei kabe ba Painel de Juri ezistente nune’e bele kontinua ho prosesu refere.
Faustino deklara, prosesu rekrutamentu tuir atualizasaun ne’ebé maka hetan prosesu ida ke la’o duni ho kompetitivu makaas no rigorozu liu husi publisidade média sira, tanba aplikantes hamutuk 1006 ne’ebe maka hadaun malu ho vaga 44 ne’ebé iha.
Inísiu ba realizasaun rekrutamentu ba iha vaga 44 iha atendimentu ba públiku iha KFP, ba Tékniku profisional grau C vaga 6, Tékniku profisional grau D vaga 7, Tékniku Administrativu grau E vaga 31 ho totál aplikantes hamutuk 1006, kompostu husi feto nain 544 (54%) no mane nain 462 (46%). Ba faze daruak nian kandidatus hamutuk 338 (34%) mak passa ba faze teste eskrita, feto nain 197 (58%) no mane nain 141 (42%) no la admitidus hamutuk 668 (66%) iha sesaun eskrita, signifika vaga refere kontinua iha konpetitividade ne’ebé mak tuir teste hodi destaka nia an hodi hakat ba faze entrevista kandidatus hamutuk 73 (18%), feto nain 42 no mane nain 31. Nune’e faze entrevista final hodi konsege konkista no prense vagas 44 hodi simu homologasaun ikus husi Prezidente KFP ba tinan 2023 hamutuk nain 44, feto nain 24 (55%) no mane nain 20 (45%).
Iha serimónia ne’e Prezidente KFP kongratula ba emposadu sira ne’ebé konsege hatudu duni sira nia kapasidade, matenek no hatudu katak, kompotente duni hodi passa ba iha vaga sira ne’e. Husu atu servisu ho profisionál, responsabilidade, labele sadere ba partidu polítiku ruma, no atu mantein servisu ida ho efisiensia, efikasia hodi presta servisu no atendimentu ida profisionál, responsabilidade ba povu no rai doben Timor-Leste.
Prosesu rekrutamentu ne’e ho kompozisaun juri nain 7, vogal nain 5 no suplente nain 2 no husi vaga 44 atu dehan katak, husi kandidaturas 1006 ne’e elimina 96% no hakat ba asina termu aseitasaun 4%.
Partisipa iha serimónia ne’e partisipa husi Prezidente no Komisárius primeiru mandatu no segundu mandatu, PDHJ, IJE, KAK, PROSIVU, INCT no família emposadus.
