Díli 4 Maiu 2022, Komisaun Funsaun Públika realiza posse no asinatura termu aseitasaun ba profisionais seniores nain 5, iha salaun Ministériu Saúde, Palácio das Cinzas-Caicoli, Díli.
Bazeia ba desizaun husi Komisaun Funsaun Públika núm. 9673/2022/PKFP no Dekretu Lei núm.22/2017, 24 Maiu kona-ba rejime profisionais seniores iha Administrasaun Públika hodi hetan omologasaun final.
Objetivu husi dekretu lei ne’e mak hamosu instrumentu hodi atrai no retein kuadrus profisionais ho kualifikadu di’ak ho esperensia às, liu-liu ba sira ne’ebé mak ezerse ona kargus diresaun durante tinan barak maibé, oituan de’it mak instituisaun aproveita.
Rejime ida ne’e ho intensaun atu akumula sira hodi kontinua kontribui no bele responde ba situasaun servisu iha Administrasaun Públika ho sira nia abilidade, koñesimentu, esperénsia sira ne’ebé mak iha no objetivu seluk mak atu hamenus dependensia ba asesores internasionais.
Relasiona ho proposta husi liñas ministeriais 13 ne’ebé mak iha, KFP hamutuk ho painel juri sira mai husi ministériu sira asegura prosesu implementasaun ba rekrutamentu profisionais seniores bazeia ba proposta husi área espesializada sira.
Iha Intervensaun Prezidente Komisaun Funsaun Públika, Faustino Cardoso Gomes enkoraja ba profesionais seniores sira atu bele hatudu nafatin liu husi atitude, liu husi komportamentu, liu husi hahalok, liu husi dezempeñu servisu ne’ebé koresponde duni ho natureza professional senior. Nune’e mós halore ba imi dezafiu, atu oinsá imi bele kontinua mantein imi ni’an espíritu konkista ida ne’e durante jornada rejime professional senior.
Tuir Komisaun Funsaun Públika, fó sai total vaga 16 bazeia ba nesesidade liñas ministeriais hanesan Ministériu Saúde vaga 1 iha área espesializada Jestaun Saúde no Espesializasaun iha Saúde Reprodutiva, Maternu no Infantil, Ministériu Asuntus Parlamentares no Komunikasaun Sosial (MAPCOMS) vaga 2 iha área espesializada Koordenasaun ba Asuntus Parlamentares no Jestaun Administrasaun, Rekursus Umanus no Planeamentu, Institutu Apoiu ba Dezenvolvimentu Emprezarial (IADE) vaga 2 iha área espesializada Formasaun no Jestaun ba Rekursus Umanus no Konsultor Negosiu Ministériu Justisa iha vaga 2 ba área espesializada Inspesaun, Auditoria ka Investigasaun no Jestaun ba Terras no Propriedades, Ministériu Planeamentu no Ordenamentu (MPO) vaga 2 iha área espesializada Jestaun Aprovizionamentu no Administrasaun, Rekursus Umanus no Lojístika, Ministériu Agrikultura no Peskas iha vaga 2 ba área espesializada Jestaun Estratéjiku Polítika no Dezenvolvimentu Floresta Komunitária no Jestaun Estratéjiku Polítika no Dezenvolvimentu Peskas no Agrikultura, Ministériu Negósius Estrangeirus no Kooperasaun (MNEK) iha vaga 1 ba área espesializada iha Jestaun Rekursus Umanus, Ministériu Administrasaun Estatal iha vaga ida ba área espesializada Jestaun ba Lixu, Komisaun Funsaun Públika iha vaga 1 ba área espesializada Dezenvolvimentu Sistemas Informasaun, Ministériu Koordenador Asuntus Ekonómikus iha vaga 2 ba área espesializada Makroekonomia no Instituisaun Ekonomikas Internasional no Integrasaun Ekonomika no Dezenvolvimentu Komersiu OMC no ASEAN.
Komisaun Funsaun Públika simu total kandidatu hamutuk 106 ba vaga 16 no kandidatu ne’ebé elejibel ba prova eskrita hamutuk nain 61 no 54 la prense rekezitus.
Ba iha sesaun entrevista nian kandidatus nain 8 deit mak passa no liu husi avaliasaun no seleksaun ikus husi painel juri nain 5 mak klasifikadu ba senior profisional kompostu husi mane nain 3 no feto nain 2.
Nune’e ohin KFP hamutuk ho Ministériu sira fó posse ba emposadu nain 5 mak KFP omologa ona hanesan Natália de Araújo nu’udar profisional Sénior Grau A Eskalaun 1 ba área espesializada Jestaun Saúde no Espesializasaun iha Saúde Reprodutiva, Maternu no Infantil, Ponciano da Cruz Leite nu’udar Grau A Eskalaun 1 ba área espesializada Jestaun Administrasaun, Rekursus Umanus no Planeamentu, Lucas António da Costa nu’udar profisional Sénior Grau A Eskalaun 1 ba área espesializada Inspesaun, Auditoria ka Investigasaun, Venêncio Moniz nu’udar profisional Sénior Grau A Eskalaun 1 ba área espesializada Jestaun Administrasaun, Rekursus Umanus no Lojístika no Claudina Soares Pintou’udar Grau A Eskalaun 1 ba área espesializada Jestaun ba Lixu.
Painel juri hamutuk sira mai husi instituisaun MAE, MAP, MNEK, MKAE, SERVE.IP, IADE, KFP, Ministériu Justisa, Ministériu Saúde, MAPKOMS, MPO no Governance of Development (GfD), mak avalia ba dokumentu hodi passa ba prosesu vaga ba kareira profisionais seniores.
Konkursu públiku ba vaga profisionál sénior loke iha loron 15 Dezembru tinan 2021, prova eskrita hala’o iha 7-8 fevereiru 2022. Tanba kestaun tempu mak prosesu hala’o fali iha 22-23 Marsu 2022 too faze final ba iha omologasaun husi Prezidente KFP.
Partisipasaun iha serimonia ne’e husi Membru do Governu sira hanesan Ministru Administrasaun Estatal, Ministra Saúde no reprezentante Ministériu Justisa, MAPCOM no Ministériu Planu Ordenamentu.