Maubara –Mandatu Komisaun Funsaun Públika ba dahaat sei kontinua kaer metin prinsipiu 5 R: revitalizasaun, reinventar, re-estruturasaun, rasionalizasaun no re-organizasaun mak matadalan atu asegura nafatin servisu komisaun nian ho imparsialidade, integridade no respomlnsabilidade servisu administrasaun públika iha futuru.
Liu husi balansu atividade KFP ba tinan 2023 ho tema jeral “Natal 2023 no tinan 2024 lori domin no dame ba fortalese prestasaun servisu Administrasaun Públika ho efikaz, efisiente, inovativu no responsavel” sai tema ba Worshop balansu aktividade servisu Komisaun Funsaun Públika tinan 2023 ne’ebé hala’o iha salaun Parokia Padres Maubara Munsipiu Liquica.
Nune’e Iha sesaun abertura ne’e Sekretária Ezekutiva hateten, worshop balansu aktividade servisu atu fó biban kada diresaun atu hato’o aktividade sira hotu alkansa ona durante tinan 2023 ho nia dezafiu sira no planu aktividade saida maka planeia atu mellora di’ak liu tan iha tinan 2024 tuir ba mandatu komisaun ba haat nian. Tanba ne’e husu ba funsionariu kada diresaun atu partisipa hahú too remata ho maximu.
Iha fatin hanesan Komisáriu portfoliu ba planeamentu forsa traballu José Telo Soares Cristovao iha abertura worshop balansu aktividade servisu KFP hateten, balansu aktividade ne’e oinsá atu haree fali aktividade servisu sira ne’ebé hala’o durante tinan 2023 no presiza iha ideia ida konstrutivu no inovativu husi parte hotu nian hodi apoiu ba mandatu da haat ba programa reajuastamentu estrutura iha tinan 2024 ho objetivu atu responde ba nesesidade komisaun nian ne’ebé parte ida husi tranzisaun jerasional husi jerasaun tuan ba jerasaun foun. Junta forsa ida atu lori funsaun públika sai ezemplar no laboratoriu ba instituisaun sira seluk iha ambiente preparasaun Timor-Leste atu tama ba membru ASEAN.
Entretantu, Komisariu ba asuntu Disiplina Agapito da Conceicao no komisariu portfoliu pensaun no reforma, Fausto Freitas da Silva fó mós hanoin kona-ba planu ida-idak nian parte ne’ebé planeia atu hala’o iha futuru iha ambitu servisu hamutuk.
Tuir Autoridade KFP, Agostinho Letêncio de Deus katak, haree husi semináriu balansu atividade no reflesaun ne’ebé hala’o liga ba planu re-estrusaun iha KFP sei halo diskusaun klean iha fulan janeiru 2024 ho objetivu fundamental maka oinsá atinje objetivu no metas ba efisiensia, efikasia, inovasaun no responsabilidade hodi responde ba nesesidade funsionariu públiku nain rihun 39 resin ne’ebé servisu iha instituisaun Estadu sira.
Tuir nia, presiza iha estrutura ida ne’ebé real hodi bele implementa polítika ne’ebé Prezidente no Komisariu sira define hodi asegura sustentabilidade implementasaun polítika to’o nivel liñas ministeriais liu husi atividade monitorizasaun rutina. Objetivu seluk ba re-estrursaun maka atu asegura Funsaun Públika ida ba oin ho ema ne’ebé “the right man on the right place” tenki halakon grupu no kór sira hodi kaer metin de’it ba prinsipiu imparsialidade integridade no responsabilidade.
Autoridade KFP ne’e mós konsidera atividade balansu no reflesaun KFP tinan ikus nian iha Maubara importante tanba atu haree ba susesu, failansu no dezafiu sira durante tinan 2023 atu hamutuk forsa no vontade servisu di’ak iha tempu oin mai.
Agostinho Letencio de Deus husu atu iha tinan 2024 presiza reativa ekipa integradu halo vizita surpreza ba iha instituisaun Estadu sira atu asegura disiplina servisu iha Administrasaun ba atendimentu públiku. No husu mós funsionariu KFP atu asegura sizilu hodi rai segredu dokumentu instituisaun públika liu husi media sosial.
Entretantu, Komisariu Fausto Freitas da Silva “Liurai Taci”, José Telo Soares Cristovao no komisariu Agapito da Consencao liu husi mensajen Natál husu funsionariu KFP atu kontinua haburas domin, dame iha família no servisu fatin atu servisu hamutuk lori Funsaun Públika ida ba interese funsionariu tomak nian no evita kria grupu no kór iha servisu fatin tanba Funsionario Públika nia partidu maka Repúblika Demokratika Timor-Leste hodi tane aas interese administrasaun públika nian ho integridade, imparsialidade no responsabilidade.
Workshop balansu aktividade ne’e hahú ho aprezentasaun panorama jerál ba implementasaun progressu sira no ezekuzaun orsamentu no fó oportunidade ba kada diresaun iha sekretariadu Komisaun Funsaun Públika hodi aprezenta programa no aktividade ne’ebé hala’o ona ho nia dezafiu durante tinan 2023 no planu aktividade ne’ebé atu hala’o iha tinan 2024.
Worshop balansu aktividade hala’o durante loron rua (20-22/12/2023) no partisipa másimu husi Prezidente KFP no komisarius, kargu diresaun xefia no funsionariu SKFP inklui asesor Nasional sira.
