Prezidente, Komisáriu KFP ne’ebé akompaña husi Sekretária Ezekutiva Interina Komisaun Funsaun Públika, hahú Tersa-feira ne’e (30/06/2026), hahú halo Konsultasaun Polítika ho kargu Diretór Jerál no Diretór Nasionál husi liñas ministeriais sira hodi halibur ideia, opiniaun, sugestaun no rekomendasaun kona-ba réjime karreira únika iha administrasaun públika, iha ámbitu reforma administrasaun públika, iha salaun Aikurus Binani, Matadouro, Dili.
Prezidente Komisaun Funsaun Públika, Agostinho Letêncio de Deus, iha aprezentasaun esplika objetivu husi konsultasaun polítika ho dirijente sira administrasaun nian, bazeia ba orientasaun husi Primeiru-Ministru atu Komisaun Funsaun Públika hamutuk ho Ministériu Finansas inisia diskusaun internu ida ho dirijente sira husi liñas ministeriais sira. Ne’e atu hateke hamutuk hodi identifika problema ho nia solusaun, hodi prodús dokumentu iha ámbitu reforma administrasaun públika nian hodi aprezenta ba Konsellu Ministru atu halo diskusaun hafoin lori ba Parlamentu Nasionál atu bele define polítika hodi solusiona problema ne’ebé durante ne’e iha, kona-ba politizasaun administrasaun, númeru rekrutamentu ne’ebé aumenta kada tinan, hasai ajentes no kazuais sira kada governasaun, inklui planu renovasaun ba Estatutu Funsaun Públika, atu nune’e iha sistema ida ne’ebé klaru no transparente iha ámbitu administrasaun públika.
Sugestaun, rekomendasaun, problema no nia solusaun atu kontribui ideia iha ámbitu ba implementasaun réjime karreira únika ne’e bazeia ba pontu importante lima (5), maka: sistema karreira administrasaun públika atuál, remunerasaun sira, sistema pagamentu, tumanu forsa traballu, no polítika de kapasitasaun rekursus umanus iha ámbitu Reforma Administrasaun Públika, liuliu jestaun rekursus umanus. Ideia sira-ne’e ne’ebé halibur durante konsultasaun polítika sei aprezenta iha Semináriu Nasionál ne’ebé sei lidera husi Primeiru-Ministru rasik hamutuk ho Ministra Finansas. Rezultadu semináriu ne’e sei lori ba enkontru Konsellu Ministru hodi autoriza lori ba Parlamentu Nasionál hodi ko’alia konaba renovasaun ba Estatutu Funsaun Públika hodi define karreira, remunerasaun, saláriu, no define nesesidade administrasaun públika iha Timor-Leste ba futuru.
Entretantu, durante konsultasaun, kargu diretór jerál no diretór nasionál sira konsidera inisiativa komisaun nian ba réjime karreira ne’e importante, maibé rekomenda katak atu halo konsultasaun no análize ida kle’an atu bele asegura kondisaun dignu ba funsionáriu sira. Importante mós réjime ne’e tenki regula ho lei ida atu asegura nia implementasaun atu labele iha politizasaun ruma ba servisu administrasaun públika iha futuru.
Kargu Diretór Jerál no Diretór Nasionál ne’ebé partisipa iha konsultasaun polítika loron dahuluk, Tersa-feira 30/06/2026, mai husi instituisaun ne’ebé tutela ba MCAE, MTA, MCI, SEFOPE, SECOOP, sentru formasaun sira, IADE, TradeInvest, Ministériu Solidariedade Sosiál, no Ministériu Transporte e Telekomunikasaun, APORTIL, ANATEL, AACTL, ANC, no TIC Timor. Atividade konsultasaun sei hala’o durante loron hat, hahú Tersa-feira 30/06/2026, no tuir planu sei remata iha loron 3 fulan-Jullu, Sesta-feira 03/07/2026.