Komisaun Funsaun Públika hala’o reuniaun kortezia ho Ministru Defeza, Filomeno Paixão hodi hato’o felisitasaun nomós koa’lia kona-ba estrutura lei organika Ministeriu Defeza, nomeasaun kargu diresaun no xefia.
Reuniaun ne’e hala’o relasiona ho proposta ne’ebé mak Komisaun simu husi Ministeriu defeza husu atu estende kargu diresaun no xefia to’o iha fulan Dezembru
“Maibé komisaun kestiona hela ba estrutura orgánika Oitavu Governu, depois estrutura orgánika ba iha Ministériu Defeza nian no bainhira maka sei hamosu, komisaun buka atu halo uniformizasaun ba iha periúdu ekstensaun ne’e, sé hot-hotu to’o iha dia 30 de Setembru entaun ba oin ekstensaun mós sei aplika ba hot-hotu kuandu, estrutura orgánika ne’e seidauk iha. Ami buka tetu mós ho tempu razuavél husi Ministériu ida-idak hamosu ninia estrutura orgánika ne’e, hodi nune’e nomeasaun sira nebe’e maka atu hala’o tenki bazeia ba ida foun,” dehan Prezidente KFP iha enkontru kortezia ho Ministru Defeza.
Iha enkontru ne’e Komisaun hato’o mós kuandu remata nomeasaun ne’ebé iha tuir proposta Ministeriu Defeza nian sei avansa ba sesaun seleksaun pur méritu hodi uniformiza ho ministeriu hotu-hotu.
Fo hanoin mos katak, Komisaun Funsaun Públika hasai ona sirkulár ida ba Ministériu hot-hotu hodi ekstende kargus diresaun no xefia ba to’o iha dia 30 de Setembru.
Enkontru ne’e hala’o iha 6 agostu Gabinete Ministru Defeza, Fatuhada.
