Komisaun Funsaun Públika nia prezensa iha serimonia tomada de posse no termu aseitasaun ba kargu diresaun no xefias iha Ministériu Ensinu Superior Siensia no Kultura senti onra boot ida, tanba atu lori mensajen importante ba ida-idak nia pozisaun durante mandatu fulan neen.
Prezidente Komisaun Funsaun Públika, Agostinho Letêncio de Deus ko’alia liafuan ne’e iha diskursu serimónia tomada de posse ba diriejentes foun nain 34 kompostu feto nain 10 no mane nain 27 ho posizaun diretor jeral, diretor nasionál, xefes departamentus no xefe unidade iha Ministériu Ensinu Superior Siensia no Kultura iha tersa-feira, (23/07/2024) iha salaun Delta Nova, Comoro.
Autoridade CFP ne’e esplika, ho serimónia tomada de posse ne’e emposadu sira jura atu hatudu responsabilidade servisu, lealdade ba superior iha Ministériu Ensinu Superior Siensia no Kultura durante mandatu fulan neen. Depois fulan neen maka naran la mosu iha lista estensaun signifika durante mandatu la halo servisu hodi lori mudansa ruma, ne’e ho resposta klaru tuir posizaun ne’ebé asume.
Nia mós esplika, iha IV mandatu KFP nian sei laiha estensaun automátiku maibé, posizaun ida-idak sei halo servisu tuir mandatu no atu estende ou lae, depende rezultadu servisu husi kada posizaun no depende mós desizaun Ministru MESSK nu’udar superior másimu.
Tamba ne’e Prezidente KFP, Agostinho Letêncio de Deus husu, emposadu sira atu servisu ho responsabilidade, servisu ho ekipa, boa vontade, inovasaun servisu iha Administrasaun Públika nia birokrasia, irarkia no hatudu lealdade ba superior mak Ministru atu bele lori planu IX Governu nian ba to’o rohan.
Entretantu, Ministru Ensinu Superior Siensia no Kultura, José Honório da Costa Pereria Jerónimo iha diskursu, husu ba emposadu sira atu kaer metin juramentu ne’ebé halo hodi rai metin segredu estadu nian, tamba nu’udar funsionáriu públiku tenki hatudu responsabilidade servisu no kaer metin konfiansa ne’ebé fó.
Ministru MESSK ne’e realsa, responsabilidade, lealdade ba superior no estadu hodi fó apoiu ba programa IX Governy Konstitusional ba kargu ne’ebé fó la’ós oportunidade maibé, leba responsabilidade hodi hatudu firmeza servisu ba Estadu.
Molok remata Ministru Ensinu Superior Siensia no Kultura, José Honório da Costa Pereira Jerónimo husu mós ba Prezidente no Komisáriu KFP atu fó atensaun ba proposta ne’ebé hato’o kona-ba planu rekrutamentu ba funsionáriu ministériu ne’e nian, tamba dadus funsionáriu permanente iha de’it nain 37, la sufisiente atu halo servisu ministériu nian.
Partisipa iha serimónia posse ne’e Komisáriu portefoliu ba forsa traballu, José Telo Soares Cristóvão, repezentante Primeiru-Ministru, Diretor Ezekutivu ANAA, Prezidente INCT, Magnifiku Reitor Universidade sira, família emposadu no funsionário sira husi Ensinu Superior Siensia no Kultura.
